لداخ, 08 جنوری (ہ س)۔ مرکز کے زیر انتظام علاقہ لداخ کی انتظامیہ نے پرنسپل سکریٹری سنجیو کھیروار کی سبکدوشی کے بعد سینئر آئی اے ایس افسران کو اضافی محکموں کی ذمہ داریاں تفویض کرتے ہوئے انتظامی سطح پر محکموں کی ازسرِنو تقسیم کر دی ہے۔
جنرل ایڈمنسٹریشن ڈیپارٹمنٹ کی جانب سے جاری سرکاری حکم نامے کے مطابق چیف سکریٹری آشیِش کندرا کو محکمہ جنگلات، ماحولیات اور ماحول کا اضافی چارج سونپا گیا ہے، جبکہ کمشنر سکریٹری ڈاکٹر لاتن کھوما فرینکلن کو محکمہ صحت و طبی تعلیم کی ذمہ داری دی گئی ہے۔
اسی حکم نامے کے تحت ایڈمنسٹریٹو سکریٹری رودرا گوڑ پی ٹی کو محکمہ محنت و روزگار کے علاوہ محکمہ سائنس و ٹیکنالوجی کا اضافی چارج بھی تفویض کیا گیا ہے۔ انتظامیہ کے مطابق اس اقدام کا مقصد حکومتی امور میں تسلسل اور انتظامی کارکردگی کو مزید مؤثر بنانا ہے۔
ہندوستھان سماچار
---------------
ہندوستان سماچار / محمد اصغر
