نئی دہلی، 19 جنوری (ہ س)۔ ہندو فریق نے مدھیہ پردیش کے دھار میں بھوج شالا تنازعہ کو لے کر سپریم کورٹ میں ایک نئی عرضی داخل کی ہے۔ درخواست میں مسلم فریق کوآنے والے جمعہ کو جس روز بسنت پنچمی بھی ہے، نماز پڑھنے سے روکنے اور صرف ہندوؤں کو دیوی سرسوتی کی پوجا کرنے کی اجازت دینے کی درخواست کی گئی ہے۔

7 اپریل 2023 کو آرکیالوجیکل سروے آف انڈیا (اے ایس آئی) کے جاری کردہ ایک حکم کے مطابق، ہندوؤں کو بھوج شالہ میں منگل اور بسنت پنچمی کو عبادت کرنے کی اجازت ہے، جب کہ مسلمان جمعہ کو دوپہر 1 سے 3 بجے کے درمیان نماز ادا کر سکتے ہیں۔ تاہم، اے ایس آئی کے حکم میں یہ واضح نہیں کیا گیا ہے کہ اگر بسنت پنچمی جمعہ کو آتی ہے تو کیا ہوگا۔

وکیل وشنو شنکر جین کے توسط سے دائر درخواست میں کہا گیا ہے کہ دیوی سرسوتی کا یہ مندر 11ویں صدی میں پرمار کنگ بھوج نے بنایا تھا۔ عدالتی احکامات پر کرائے گئے سروے نے بھی یہاں مندر کے وجود کی تصدیق کی ہے۔ جبکہ اے ایس آئی کا حکم فطری طور پر غلط ہے، بسنت پنچمی وہ دن ہے جو دیوی سرسوتی کی پوجا کے لیے وقف ہے۔ ضروری مذہبی رسومات جیسے ہوون، پوجا، اور مہا آرتی کو قرارداد سے لے کر آخری نذرانے تک بغیر کسی رکاوٹ کے انجام دیا جانا چاہیے۔ مندر کی حرمت کو برقرار رکھا جائے۔ اس لیے اس دن نماز پڑھنے کی اجازت نہیں ہونی چاہئے۔

ہندوستھان سماچار

---------------

ہندوستان سماچار / عبدالواحد