ممبئی ، 19 جنوری (ہ س)۔ بریہن ممبئی میونسپل کارپوریشن میں میئر کے انتخاب کو لے کر جاری قیاس آرائیوں کے درمیان نائب وزیر اعلیٰ ایک ناتھ شندے نے 19 جنوری، پیر کو کہا کہ ممبئی میں میئر بی جے پی اتحاد کا ہی ہوگا۔ انہوں نے واضح کیا کہ اتحاد کے اندر اس معاملے پر کسی قسم کا اختلاف یا تنازع موجود نہیں ہے۔

ایک ناتھ شندے کے مطابق، جن میونسپل کارپوریشنوں میں بی جے پی اتحاد نے مل کر انتخابی میدان میں اتر کر کامیابی حاصل کی ہے، وہاں عددی طاقت کی بنیاد پر میئر کا فیصلہ کیا جائے گا۔ انہوں نے یہ بھی کہا کہ جہاں اتحاد کے تحت انتخابات نہیں ہوئے، وہاں جس جماعت کے پاس زیادہ کونسلر ہوں گے، وہی میئر کے بارے میں مقامی سطح پر فیصلہ کرے گی۔

انہوں نے ممبئی کے نو منتخب کونسلروں کو ہوٹل میں رکھنے پر ہونے والی تنقید کا جواب دیتے ہوئے کہا کہ یہ قدم صرف تعارف، رابطے اور تربیتی مقصد کے لیے اٹھایا گیا ہے۔ شندے نے دو ٹوک انداز میں کہا کہ اس اقدام کو سیاسی سازش کے طور پر نہ دیکھا جائے۔

شیو سینا یو بی ٹی کے رہنما سنجے راؤت کی جانب سے لگائے گئے ان الزامات پر کہ شندے گروپ کے کونسلر پارٹی چھوڑ سکتے ہیں، نائب وزیر اعلیٰ نے سخت ردعمل ظاہر کیا۔ انہوں نے کہا کہ جو کونسلر طے شدہ اتحاد کے تحت منتخب ہوئے ہیں، وہ اس اتحاد سے غداری نہیں کریں گے۔

ایک ناتھ شندے نے کہا کہ اتحاد چھوڑنا عوام کے فیصلے اور ووٹروں کے اعتماد کی بے حرمتی ہوگی، اور ان کی جماعت کسی بھی حالت میں ایسی صورتِ حال کو قبول نہیں کرے گی۔

ہندوستھان سماچار

--------------------

ہندوستان سماچار / جاوید این اے