نئی دہلی، 17 جنوری (ہ س)۔

وزیر اعظم نریندر مودی نے ہفتہ کو مغربی بنگال کے مالدہ میں ملک کی پہلی وندے بھارت سلیپر ٹرین کو ہری جھنڈی دکھائی۔ یہ ٹرین کولکاتہ (ہاوڑہ) اور گوہاٹی (کامکھیا) کے درمیان چلے گی اور موجودہ 17 گھنٹے کے سفر کے مقابلے 958 کلومیٹر کا فاصلہ صرف 14 گھنٹے میں طے کرے گی۔

افتتاح کے دوران وزیراعظم نے ٹرین میں بچوں اور طلباء سے بات چیت کی۔ طلباء نے نظمیں سنائیں اور اپنے تجربات سے آگاہ کیا، جب کہ وزیراعظم نے آٹو گراف پر دستخط کیے اور اپنے اپنے تجربات شیئر کیے۔ انہوں نے ٹرین ڈرائیور اور عملے سے بھی بات چیت کی۔ اسٹیشن پر لوگوں نے ہاتھ میں ترنگا لے کر وزیر اعظم کا استقبال کیا۔ اسٹیشن پر ایک بڑا ہجوم جمع ہوگیا۔ ریلوے کے وزیر اشونی ویشنو نے تقریب میں وزیر اعظم کو دیوی درگا کی مورتی پیش کی۔

ریلوے بورڈ کے مطابق وندے بھارت سلیپر ٹرین میں آر اے سی کا کوئی انتظام نہیں ہوگا۔ ٹرین میں کل 16 ڈبے ہوں گے جن میں 11 تھرڈ اے سی، 4 سیکنڈ اے سی اور 1 فرسٹ اے سی شامل ہیں۔ کرایہ راجدھانی ایکسپریس جیسی پریمیم ٹرینوں سے تھوڑا زیادہ ہوگا۔ گوہاٹی سے ہاوڑہ تک تھرڈ اے سی کا کرایہ تقریباً 2,300 روپے مقرر کیا گیا ہے۔

قابل ذکر ہے کہ ریلوے کے وزیر ویشنو نے یکم جنوری کو ہاوڑہ-گوہاٹی روٹ پر اے سی-1، اے سی-2 اوراے سی-3 کلاسوں کے عارضی کرایوں کا اعلان کیا تھا۔

ہندوستھان سماچار

ہندوستان سماچار / عطاءاللہ