ممبئی، 15 جنوری (ہ س) مہاراشٹر کے بلدیاتی انتخابات کے دوران سامنے آنے والے تنازعات کے بیچ شیو سینا (یو بی ٹی) کے سربراہ ادھو ٹھاکرے نے ریاستی الیکشن کمیشن کو سخت تنقید کا نشانہ بناتے ہوئے کہا ہے کہ موجودہ صورتحال کے پیشِ نظر ریاستی الیکشن کمشنر کو اخلاقی ذمہ داری قبول کرتے ہوئے عہدے سے مستعفی ہو جانا چاہیے۔

ممبئی میں ووٹ ڈالنے کے بعد میڈیا سے گفتگو کرتے ہوئے ادھو ٹھاکرے نے کہا کہ انتخابات کے دوران مختلف علاقوں سے یہ شکایات سامنے آ رہی ہیں کہ ووٹروں کی انگلیوں پر لگایا گیا نشان آسانی سے مٹ رہا ہے۔ انہوں نے کہا کہ ماضی میں سیاہی کا استعمال کیا جاتا تھا، مگر اس بار بغیر کسی پیشگی مشاورت کے مارکر پین سے نشان لگانے کا فیصلہ کیا گیا، جس نے شکوک و شبہات کو جنم دیا ہے۔

ادھو ٹھاکرے نے الزام عائد کیا کہ اسی طرح الیکشن کمیشن نے اچانک ای وی ایم مشینوں سے وی وی پی اے ٹی ہٹانے کا فیصلہ بھی کیا، جو تمام سیاسی جماعتوں کے اعتماد میں لیے بغیر کیا گیا۔ ان کے مطابق یہ فیصلے شفاف انتخابی عمل کے منافی ہیں اور اسی وجہ سے ریاستی الیکشن کمشنر کو مستعفی ہونا چاہیے۔

اس معاملے پر مہاراشٹر نونرمان سینا کے صدر راج ٹھاکرے نے بھی کمیشن پر شدید اعتراض کیا۔ انہوں نے کہا کہ سینٹائزر کے استعمال سے مارکر کا نشان مٹ جاتا ہے، جس سے فرضی ووٹنگ کے خدشات پیدا ہوتے ہیں۔ انہوں نے کہا کہ اگر اس طرح کے حالات ہیں تو یہ جمہوریت کے لیے خطرناک ہے، اور عوام کو زیادہ سے زیادہ تعداد میں ووٹ ڈال کر جمہوریت کا تحفظ کرنا چاہیے۔

ان الزامات کے جواب میں ریاستی الیکشن کمیشن نے وضاحت جاری کرتے ہوئے کہا ہے کہ اگر کوئی شخص جان بوجھ کر انگلی سے سیاہی مٹا کر دوبارہ ووٹ ڈالنے کی کوشش کرتا ہے تو اس کے خلاف قانونی کارروائی کی جائے گی۔ کمیشن کے مطابق ووٹ ڈالنے کے بعد ہر ووٹر کا ریکارڈ محفوظ کیا جاتا ہے، اس لیے سیاہی مٹانے سے دوبارہ ووٹنگ ممکن نہیں۔ الیکشن کمیشن نے کہا کہ تمام متعلقہ حکام کو اس معاملے میں مکمل چوکسی برتنے کی ہدایت دی گئی ہے۔

ہندوستھان سماچار

ہندوستان سماچار / جاوید این اے