بھوپال، 15 جنوری (ہ س)۔ وزیر اعلیٰ ڈاکٹر موہن یادو نے ریاست کی دارالحکومت بھوپال میں جمعرات کو اسپیس ٹیک پالیسی لانچ کر کے اے آئی-خلائی اختراع کو نئی اڑان دی ہے۔

وزیر اعلیٰ ڈاکٹر یادو آج بھوپال کے تاج لیک فرنٹ میں منعقدہ ’مدھیہ پردیش ریجنل اے آئی امپیکٹ کانفرنس-2026‘ سے خطاب کر رہے تھے۔ انہوں نے کہا کہ یہ تکنیکی تبادلہ خیال کا پلیٹ فارم بننے کے ساتھ ہی ڈیجیٹل اور سائنسی مستقبل کی سمت طے کرنے والا تاریخی موقع بھی ثابت ہوئی ہے۔ انہوں نے کہا کہ یہ پالیسی مدھیہ پردیش کو ہندوستان کے ابھرتے خلائی شعبے میں ایک اہم، اختراع پر مبنی اور مستقبل پر مرکوز ریاست کے طور پر قائم کرے گی۔

وزیر اعلیٰ نے کہا کہ خلائی تکنیک اب راکٹ اور سیٹلائٹ تک محدود نہیں رہی ہے، اس کا سیدھا اثر عام شہری کی زندگی پر پڑ رہا ہے۔ نئی اسپیس ٹیک پالیسی کے تحت ریاست میں اسپیس ٹیک اسٹارٹ اپس، ایم ایس ایم ای اور صنعتوں کو مالی، بنیادی ڈھانچہ اور تحقیقی تعاون فراہم کیا جائے گا۔ اس کا مقصد زراعت، ڈیزاسٹر مینجمنٹ، آبی وسائل کا انتظام، شہری منصوبہ بندی، ماحولیاتی تحفظ اور بنیادی ڈھانچے کی ترقی جیسے شعبوں میں خلا پر مبنی اطلاعات کو فروغ دینا ہے۔

انہوں نے کہا کہ یہ پالیسی سرمایہ کاری متوجہ کرے گی، اختراع کو ترغیب دے گی اور قومی خلائی ایکو نظام میں مدھیہ پردیش کے کردار کو مضبوط بنائے گی۔ کانفرنس میں انوویشن اور اسکل ڈیولپمنٹ کو رفتار دینے کے لیے کئی اہم معاہدے بھی کیے گئے۔ وزیر اعلیٰ کی موجودگی میں سائنس اور ٹیکنالوجی محکمے کے ذریعے ینگوویٹر، سی ای ای ڈبلیو، گوگل، نیس کام، اے آئی سیکٹ اور بھاشنی کے ساتھ چھ مفاہمت ناموں پر دستخط کیے گئے۔

ان ایم او یوز کا مقصد تعلیمی اداروں میں انوویشن اور روبوٹکس کو فروغ دینا، ماحولیاتی تبدیلی اور پائیدار ترقی سے جڑے شعبوں میں اے آئی پر مبنی تحقیق اور فیصلہ سازی کے نظام کو تیار کرنا، سرکاری محکموں میں اے آئی اور کلاؤڈ تکنیکوں کے استعمال کو بڑھانا اور ریاست میں اے آئی سینٹر آف ایکسی لینس کے قیام کے ذریعے اسکل ڈیولپمنٹ کو نئی سمت دینا شامل ہے۔

اس کے ساتھ ہی دیہی اور پسماندہ علاقوں میں ڈیجیٹل خواندگی اور اے آئی بیداری بڑھانے اور اے آئی پر مبنی حکمرانی کو مضبوط بنانے پر بھی خصوصی زور دیا گیا۔ وہیں، انڈیا اے آئی مشن اور مدھیہ پردیش حکومت کے ٹیکنیکل ایجوکیشن، اسکل ڈیولپمنٹ اور روزگار محکمے کے درمیان ایک اہم مفاہمت نامہ بھی ہوا۔ اس ایم او یو کے تحت اعلیٰ معیار کی اے آئی تعلیم کو وسیع بنانے کے لیے ملک کے ٹو-ٹیر اور تھری-ٹیر شہروں میں 570 ڈیٹا اور اے آئی لیبز قائم کرنے کا منصوبہ ہے۔ اسی سلسلے میں مدھیہ پردیش میں 30 ڈیٹا اور اے آئی لیبز کا قیام کیا جائے گا، جس سے نوجوانوں کو جدید تکنیکی ٹریننگ ملے گی اور روزگار کے نئے مواقع پیدا ہوں گے۔

کانفرنس کے دوران مدھیہ پردیش انوویشن ایکسپو کا بھی آغاز کیا گیا، جو ریاست کی تکنیکی صلاحیتوں اور اختراعات کا جاندار مظاہرہ بنا۔ ایکسپو میں انڈیا اے آئی پیویلین، مدھیہ پردیش پیویلین اور اسٹارٹ اپ شو-کیس شامل رہے۔ مدھیہ پردیش پیویلین میں ریاستی حکومت کی اے آئی پر مبنی اختراعی پہلوں کی نمائش کی گئی ، جن کا مقصد حکمرانی کو زیادہ درست، شفاف اور نتیجہ خیز بنانا ہے۔

محکمہ ریونیو کے ذریعے تیار کردہ ’سارا-ڈی سی ایس‘ ایپ کے ذریعے اے آئی کا استعمال کر کے فصل کی تصاویر کی ریئل ٹائم میں کوالٹی جانچ کی جا رہی ہے۔ منریگا کے تحت اے آئی سے چلنے والے ضلع کارکردگی رپورٹ سسٹم سے ڈیٹا پر مبنی فیصلہ لینا آسان ہوا ہے۔

محکمہ زراعت کی ’ایگری جی آئی ایس‘ سسٹم فصل کی پیشین گوئی، فصل صحت نگرانی اور بیمہ دعویٰ تصفیہ کو زیادہ موثر بنا رہی ہے۔ دوسری طرف محکمہ محنت کی اے آئی اہل ’ایل سی ایم ایس‘ سسٹم کیس مینجمنٹ اور عدالتی عمل کو خودکار بنا رہی ہے۔ مدھیہ پردیش پولیس کے ذریعے اپنائی گئی اے آئی پر مبنی اسمارٹ پولیسنگ سے کرائم کنٹرول، جانچ کی صلاحیت اور شہری تحفظ کو نئی مضبوطی ملی ہے۔

کانفرنس میں قومی اے آئی خواندگی پروگرام پر مبنی ایک خصوصی ویڈیو کی بھی نمائش کی گئی۔ اس میں بتایا گیا کہ وزیر اعظم نریندر مودی کی دور اندیش قیادت میں حکومت ہند اے آئی خواندگی کو شہریوں اور ورک فورس کے لیے ایک بنیادی جیون کوشل کے طور پر تیار کرنے کے لیے لگاتار کوشش کر رہی ہے۔ اسی ہدف کے تحت ’یوا اے آئی فار آل‘ قومی مہم شروع کی گئی ہے، جس کا مقصد ہر شہری کو اے آئی کے تئیں بیدار بنانا اور ضروری تکنیکی صلاحیتوں سے لیس کرنا ہے۔ اس پیغام کو دیہی علاقوں تک پہنچانے کے لیے کوشل رتھ جیسے اقدامات کیے جا رہے ہیں۔

ہندوستھان سماچار

---------------

ہندوستان سماچار / انظر حسن