نئی دہلی، 3 ستمبر (ہ س)۔

عام آدمی پارٹی (آپ) کے قومی کنوینر اروند کیجریوال کی ہدایت پر دہلی کے ریاستی صدر سوربھ بھاردواج بدھ کو سیلاب سے متاثرہ لوگوں کے لیے امدادی سامان لے کر پنجاب پہنچے۔

اس موقع پر سوربھ بھاردواج نے سوشل میڈیا پر پوسٹ کرتے ہوئے کہا کہ پنجاب کو اس وقت شدید سیلاب کا سامنا ہے۔ یہاں لوگوں کی فصلیں اور مویشی ڈوب گئے ہیں جس سے بھاری نقصان ہوا ہے۔ انہوں نے بتایا کہ اروند کیجریوال کی ہدایت پر دہلی سے امدادی سامان کی پہلی کھیپ بھیجی گئی ہے اور ضرورت مندوں کو خدمات فراہم کی جائیں گی۔

سوربھ بھاردواج نے کہا کہ پنجاب حکومت، وزراء اور مقامی لوگ امدادی کاموں میں لگاتار مصروف ہیں۔ منگل کو دہلی کے سابق وزیر اعلی اروند کیجریوال نے ہر کسی سے اس مشکل وقت میں پنجاب کے لوگوں کی خدمت کے لیے آگے آنے کی اپیل کی تھی۔ اس کے ساتھ ہی انہوں نے اہل وطن سے اپیل کی تھی کہ وہ پنجاب کے سیلاب سے متاثرہ لوگوں کی مدد کے لیے امدادی سامان فراہم کریں۔

انہوں نے کہا کہ پنجابی اور سکھ بھائی ہر آفت کے وقت لنگر کھول کر سب سے پہلے خدمت کرتے ہیں۔ ایسے میں آج ملک بھر سے لوگ پنجاب میں اپنا تعاون بھیج رہے ہیں۔ بھاردواج نے کہا کہ آر ڈبلیو ڈی اور تاجر بھی راحت کے کام میں اپنی سطح پر تعاون کر رہے ہیں۔

انہوں نے کہا کہ پورا ملک پنجاب کے ساتھ کھڑا ہے اور ہر ممکن مدد فراہم کی جا رہی ہے۔

ہندوستھان سماچار

ہندوستان سماچار / عطاءاللہ