بھوپال، یکم ستمبر (ہ س)۔رتلام میں کانگریس کی ’ووٹ چور، گڈی چھوڑ‘ ریلی میں شرکت کرنے پہنچے مدھیہ پردیش کانگریس کے صدر جیتو پٹواری کے قافلے پراتوار کو دھاکڑ برادری کے کچھ لوگوں نے حملہ کر دیا ۔حالانکہ، اس واقعہ میں پٹواری کو کوئی چوٹ نہیں آئی تاہم کانگریس نے اس واقعہ کی مذمت کرتے ہوئے بی جے پی کو نشانہ بنایا ہے۔ پیر کو کانگریس قائدین کے ایک وفد نے ڈائرکٹر جنرل آف پولیس سے ملاقات کی اور انہیں ایک میمورنڈم سونپا اور جیتو پٹواری کو سیکورٹی فراہم کرنے کا مطالبہ کیا۔

میڈیا انچارج مکیش نائک کی قیادت میں ریاستی کانگریس کمیٹی کے سینئر لیڈروں کے ایک وفد نے ریاستی ڈائرکٹر جنرل آف پولیس سے ملاقات کی اور ایک میمورنڈم پیش کیا اور پٹواری کے حفاظتی انتظامات کو مزید مضبوط کرنے کا مطالبہ کیا۔ کانگریس قائدین نے کہا کہ بی جے پی کے زیر اہتمام حملوں کا سلسلہ ظاہر کرتا ہے کہ حکمران جماعت جمہوری احتجاج کی آواز سے خوفزدہ ہے اور اپوزیشن لیڈروں کی آواز کو دبانے کے لئے تشدد کا سہارا لے رہی ہے۔

انہوں نے کہا کہ 20 مارچ کو رتلام میں منعقد ”ووٹ چور- گدی چھوڑ“ ریلی کے دوران بی جے پی کے حمایت یافتہ سماج دشمن عناصر کی طرف سے پتھراو کرنا ریاستی کانگریس صدر پر مہلک حملے کے واضح ارادے کو ظاہر کرتا ہے۔ کانگریس قائدین نے انتباہ دیا کہ اگر ریاستی کانگریس صدر کے حفاظتی انتظامات کو فوری طور پر اعلیٰ سطح پر نہیں بڑھایا گیا تو اس کی ذمہ داری ریاستی حکومت اور انتظامیہ کی ہوگی۔

ریاستی کانگریس کمیٹی کا کہنا ہے کہ جیتو پٹواری پر حملے سیاسی سازش کا حصہ ہیں۔ اپوزیشن کے اعلیٰ رہنماوں کو سیکورٹی فراہم نہ کرنا جمہوریت کی روح کے منافی ہے۔ کانگریس پارٹی اسے کسی بھی صورت میں برداشت نہیں کرے گی۔ ریاستی کانگریس کمیٹی نے یہ بھی واضح کیا کہ جناب پٹواری کی حفاظت میں کسی بھی قسم کی کوتاہی ریاست کی سیاست اور انتظامیہ دونوں کے لیے سنگین نتائج کا باعث بن سکتی ہے۔ میمورنڈم پیش کرنے والوں میں کانگریس لیڈر اور سابق وزیر پی سی شرما، سٹی ڈسٹرکٹ صدر پروین سکسینہ، دیہی ضلع صدر انوکھی مان سنگھ پٹیل اور دیگر کئی کارکنان شامل تھے۔

ہندوستھان سماچار

ہندوستان سماچار / محمد شہزاد