نئی دہلی ،31اگست (ہ س )۔
ٹوکیو اولمپکس میں کانسی کا تمغہ جیتنے والی ہندوستان کی اسٹار باکسر لولینا بورگوہین نے حال ہی میں انکشاف کیا ہے کہ وہ پیرس اولمپکس کے بعد ریٹائرمنٹ لینے پر غور کر رہی تھیں۔ لیکن وہاں میڈل سے محروم ہونے کے بعد انہوں نے اپنا فیصلہ ملتوی کر دیا۔ آسام کی یہ باکسر آئندہ عالمی چمپئن شپ سے بین الاقوامی سطح پر واپسی کرنے کے لیے تیار ہے اور اس کا ہدف اولمپکس میں دوسرا تمغہ جیتنا ہے۔
لولینا نے کہا کہ اگر وہ پیرس میں تمغہ جیتتی تو شاید باکسنگ کو الوداع کہہ دیتیں۔ انہوں نے کہا، 'میں نے پیرس تک کھیلنے کا منصوبہ بنایا تھا۔ اگر میں وہاں کوئی تمغہ جیتتی تو شاید میں اس کھیل کو خیرباد کہہ دیتی۔ لیکن اب میں دوبارہ واپسی کے لیے تیار ہوں۔' ٹوکیو اولمپکس کی کانسی کا تمغہ جیتنے والی لولینا گزشتہ سال اگست میں پیرس اولمپکس کے بعد سے بین الاقوامی مقابلوں سے دور ہیں۔
رنگ سے دور رہتے ہوئے، انہوں نے اپنی اکیڈمی قائم کرنے پر توجہ مرکوز کی، جس کا جون میں گوہاٹی میں افتتاح ہوا تھا۔ لولینا نے کہا، 'جب میں نے اپنی اکیڈمی شروع کرنے کا سوچا تھا تو میں نے پیرس (اولمپکس) تک کھیلنے کا ارادہ کیا تھا اور اس کے بعد میں ریٹائر ہو سکتی ہوں، لیکن پیرس میں نتیجہ وہ نہیں رہا جیسا میں نے سوچا تھا۔ اگر میں نے وہاں کوئی تمغہ جیت لیا ہوتا تو میں اس کھیل کو الوداع کہہ سکتی تھی۔'
فرانسیسی دارالحکومت میں، 27 سالہ لولینا اپنا لگاتار دوسرا اولمپک تمغہ جیتنے کے بہت قریب پہنچی، لیکن خواتین کی مڈل ویٹ (75 کلوگرام) کیٹیگری کے کوارٹر فائنل میں چینی چمپئن لی کیان سے ہار گئیں۔ جب لولینا سے پوچھا گیا کہ کیا 2028 کے اولمپک گیمز ان کا آخری ٹورنامنٹ ہو سکتا ہے تو انہوں نے کہا، 'ہاں، یہ ممکن ہے۔ میں پیرس اولمپکس میں بھی گولڈ میڈل جیت سکتی تھی کیونکہ میں نے اس سے پہلے پوڈیم تک پہنچنے والے تمام کھلاڑیوں کو شکست دی تھی۔ جو میرے کھیل کی سطح کو ظاہر کرتا ہے۔ میں اولمپک میڈل جیت سکتی ہوں۔'
لولینا 4 ستمبر سے لیور پول میں شروع ہونے والی عالمی چمپئن شپ میں شرکت کریں گی تاہم انہوں نے اعتراف کیا کہ انہوں نے اس مقابلے کے لیے محدود تیاری کی ہے۔ انہوں نے کہا، 'میں طویل وقفے کے بعد بین الاقوامی سطح پر مقابلہ کرنے جا رہی ہوں۔ میرے پاس تیاری کے لیے صرف ایک مہینہ ہے، اس لیے میں اپنی صلاحیت اور طاقت پر بھی کام کر رہی ہوں۔
ہندوستھان سماچار
ہندوستان سماچار / عطاءاللہ
