ڈھاکہ، 31 جولائی (ہ س)۔ دو عدالتوں نے آج بنگلہ دیش کی معزول وزیر اعظم شیخ حسینہ سمیت 100 افراد کے خلاف چھ مقدمات میں فرد جرم عائد کی ہے۔ یہ کیسز راجوک پربانچل نیو ٹاؤن پروجیکٹ میں پلاٹوں کی الاٹمنٹ میں بے ضابطگیوں سے متعلق ہیں۔ ڈھاکہ کی خصوصی عدالت-4 کے جج ربیع العالم نے تین مقدمات میں فرد جرم عائد کی اور ڈھاکہ کی خصوصی عدالت-5 کے جج محمد عبداللہ المامون نے تین مقدمات میں فرد جرم عائد کی۔ جج ربیع العالم نے ان مقدمات میں گواہی ریکارڈ کرانے کے لیے 13 اگست کی تاریخ مقرر کی اور ملزمان کے وارنٹ گرفتاری جاری کر دیے۔
ڈھاکہ ٹریبیون کے مطابق شیخ حسینہ کے علاوہ دیگر مرکزی ملزمان میں اجمینہ صدیقی، رضوان مجیب صدیق، سجیب واجد جوائے اور صائمہ واجد پتل شامل ہیں۔ ملزمان کے مفرور ہونے کی وجہ سے ان کے وارنٹ گرفتاری جاری کر دیے گئے ہیں۔ انسداد بدعنوانی کمیشن (اے سی سی) کے پبلک پراسیکیوٹر میر احمد علی سلام نے کہا کہ 22 جولائی کو دونوں عدالتوں نے ان مقدمات میں فرد جرم عائد کرنے پر سماعت کے لیے 31 جولائی کی تاریخ مقرر کی تھی۔
ڈھاکہ میٹروپولیٹن کے سینئر اسپیشل جج ذاکر حسین غالب نے 20 جولائی کو کیسز خصوصی جج کی عدالت میں بھیجے تھے۔ اس سے قبل، 01 جولائی کو عدالت نے ان مقدمات میں حسینہ، ان کی بہن شیخ ریحانہ اور ان کے بیٹے سجیب واجد جوائے سمیت 100 افراد کو طلب کرتے ہوئے گزٹ نوٹیفکیشن شائع کرنے کا حکم دیا تھا۔ اے سی سی نے 12 جنوری سے 14 جنوری کے درمیان چھ مقدمات درج کئے۔ تفتیشی افسران نے 10 مارچ کو چارج شیٹ داخل کی۔
اے سی سی کے ڈپٹی ڈائریکٹر محمد صلاح الدین نے 14 جنوری کو شیخ حسینہ سمیت آٹھ افراد کے خلاف پوربانچل نیو ٹاؤن پروجیکٹ میں 10 کٹھہ پلاٹ الاٹ کرنے میں اختیارات کا غلط استعمال کرنے پر مقدمہ درج کیا تھا۔ اے سی سی کے اسسٹنٹ ڈائریکٹر ایس ایم راشد الحسن نے 14 جنوری کو شیخ حسینہ سمیت 15 افراد کے خلاف دوسرا مقدمہ درج کیا۔
اے سی سی کے ڈپٹی ڈائریکٹر محمد صلاح الدین نے قبل ازیں 13 جنوری کو شیخ حسینہ، ان کی بہن شیخ ریحانہ، ریحانہ کے بیٹے رضوان مجیب صدیق اور بیٹیوں ٹیولپ صدیق اور اجمینہ صدیق سمیت 15 افراد کے خلاف راجوک سے پلاٹ حاصل کرنے کے لیے اختیارات کا ناجائز استعمال کرنے پر ایک اور مقدمہ درج کیا تھا۔
اسی تاریخ کو شیخ حسینہ، ٹیولپ صدیق اور اجمینہ صدیق سمیت 16 افراد کے خلاف ایک اور مقدمہ درج کیا گیا۔ 13 جنوری کو رضوان مجیب صدیق اور دیگر 15 افراد کے خلاف ایک اور مقدمہ درج کیا گیا۔ 12 جنوری کو اے سی سی کے اسسٹنٹ ڈائریکٹر افنان جنت کیا نے شیخ حسینہ اور صائمہ واجد پتل سمیت 16 افراد کے خلاف ایک اور مقدمہ درج کیا۔
---------------
ہندوستان سماچار / عبدالسلام صدیقی
