اشوک نگر میں ہیلی کاپٹر کے ذریعے راحت اور بچاو کا کام جاری ہے

وزیر اعلیٰ شدید بارش کے دوران راحت اور بچاو کے کاموں پر نظر رکھے ہوئے ہیں

بھوپال، 30 جولائی (ہ س)۔

وزیر اعلیٰ ڈاکٹر موہن یادو نے کہا کہ ریاست میں جاری بھاری بارش اور سیلاب کی صورتحال سے نمٹنے کے لیے ریاستی حکومت پوری سنجیدگی اور مستعدی کے ساتھ کام کر رہی ہے۔ مشکل کی اس گھڑی میں حکومت پوری طرح ریاستی عوام کے ساتھ کھڑی ہے۔ سیلاب سے متاثرہ اضلاع میں امدادی اور بچاو کام جنگی بنیادوں پر جاری ہے۔ وزیر اعلیٰ ڈاکٹر یادو نے کہا کہ امدادی کارروائیوں میں تیزی لانے کے لیے ریاستی حکومت نے مرکزی وزارت دفاع سے فوج کے ہیلی کاپٹروں کا مطالبہ کیا ہے۔ اشوک نگر ضلع میں لکھنؤ سے بھیجا گیا ایک ہیلی کاپٹر راحت اور بچاو کے کاموں میں سرگرم ہے۔

وزیر اعلیٰ نے بدھ کو بھوپال میں واقع اسٹیٹ ڈیزاسٹر کنٹرول روم (اسٹیٹ کمانڈ سینٹر) سے سیلاب سے متاثرہ علاقوں میں جاری بچاو آپریشن کا براہ راست معائنہ کیا۔ معائنہ کے بعد میڈیا کو ایک پیغام میں وزیر اعلیٰ ڈاکٹر یادو نے کہا کہ اب تک تقریباً 2,900 لوگوں کو مرینا، گنا، شیو پوری، ریوا، رائسین، دموہ اور اشوک نگر جیسے اضلاع سے بحفاظت بچا کر راحت کیمپوں میں لے جایا گیا ہے۔ ان کیمپوں میں متاثرین کو خوراک، کپڑے، ادویات اور دیگر ضروری اشیاء فراہم کی جا رہی ہیں۔ وزیر اعلیٰ ڈاکٹر یادو نے کہا کہ ریسکیو ٹیموں کو پوری صلاحیت اور وسائل کے ساتھ میدان میں تعینات کیا گیا ہے۔ انہوں نے بتایا کہ ریاست میں آئندہ دو تین دنوں تک بارش کی صورتحال برقرار رہنے کا امکان ہے، جس کے پیش نظر تمام اضلاع میں انتظامیہ کو ہائی الرٹ اور ہمہ وقت تیار رہنے کی ہدایت دی گئی ہے۔

وزیر اعلیٰ ڈاکٹر یادو نے ریاست کے لوگوں سے محتاط رہنے کی اپیل کی ہے، نالوں اور پانی بھرے علاقوں سے فاصلہ رکھیں، برقی کرنٹ اور خستہ حال مکانات سے ہوشیار رہیں اور کسی بھی آفت کی صورت میں فوری طور پر اپنی تحصیل یا ضلع کے فیلڈ کنٹرول روم کو اطلاع دیں۔ انہوں نے کہا کہ ہماری حکومت ہر شہری کی حفاظت اور مدد کے لیے پوری طرح پرعزم ہے۔ انہوں نے کہا کہ کسی بھی ناخوشگوار صورتحال یا سیلاب وغیرہ میں پھنسے ہوئے لوگ بالکل بھی گھبرائیں نہیں، حکومت ہر کسی کی حفاظت کے لیے ہمہ وقت تیار ہے۔

ہندوستھان سماچار

---------------

ہندوستان سماچار / انظر حسن