نئی دہلی، 30 جولائی (ہ س)۔

برمنگھم میں جاری ورلڈ چمپئن شپ آف لیجنڈز (ڈبلیو سی پی ایل) 2025 میں بھارت کی چمپئن ٹیم نے پاکستان کے خلاف سیمی فائنل میچ کھیلنے سے صاف انکار کر دیا ہے۔ یہ فیصلہ بھارتی حکومت کے اس موقف کے عین مطابق ہے جس نے دہشت گردی کی وجہ سے پڑوسی ملک پاکستان کے ساتھ کھیلوں کے کسی بھی قسم کے باہمی تعلقات کو مسترد کر دیا ہے۔

کہا جاتا ہے کہ ہندوستانی ٹیم نے یہ سخت موقف پہلگام دہشت گردانہ حملے اور اس کے بعد ہندوستانی فوج کی طرف سے شروع کئے گئے 'آپریشن سندور' کے پیش نظر اٹھایا ہے۔ ٹیم میں شیکھر دھون، عرفان پٹھان، ہربھجن سنگھ، یوراج سنگھ اور سریش ریناجیسے تجربہ کار کھلاڑی شامل ہیں۔

اس سے قبل بھی بھارت نے ٹورنامنٹ کے گروپ مرحلے میں پاکستان کے خلاف کھیلنے سے انکار کر دیا تھا۔ اس وقت بھی کئی سابق بھارتی کرکٹرز پاکستان کے خلاف کھیلنے کو تیار نہیں تھے۔

ٹریول ٹیک کمپنی ایزی مائی ٹریپ، جو ٹورنامنٹ کے بڑے اسپانسرز میں سے ایک ہے، نے بھی اس معاملے پر ہندوستان کی حمایت کی ہے۔ کمپنی کے شریک بانی نشانت پٹی نے سوشل میڈیا پر لکھا، دہشت گردی اور کرکٹ ایک ساتھ نہیں چل سکتے۔ ہندوستانی ٹیم نے جس طرح کا مظاہرہ کیا ہے اس پر ہمیں فخر ہے، لیکن پاکستان کے خلاف سیمی فائنل صرف ایک میچ نہیں ہے۔

ایزی مائی ٹرپ خود کو اس میچ سے الگ کرتا ہے - ملک پہلے، کاروبار بعد میں۔ بھارت کی چمپئن ٹیم نے منگل کو ویسٹ انڈیز چیمپئنز کو صرف 13.2 اوورز میں شکست دے کر سیمی فائنل میں جگہ بنا لی۔ اب پاکستان کے خلاف نہ کھیلنے کے فیصلے نے ٹورنامنٹ کے مستقبل پر بڑا سوال کھڑا کر دیا ہے۔

ہندوستھان سماچار

ہندوستان سماچار / عطاءاللہ