ادھم سنگھ نگر/کاشی پور، 03 جولائی (ہ س)۔ وزیر اعلیٰ پشکر سنگھ دھامی کی ہدایات پر سرکاری زمین پر مذہبی تجاوزات کے خلاف ریاست گیر مہم کے ایک حصے کے طور پر انتظامیہ نے کاشی پور کے کنڈیشوری علاقے میں پانچ غیر قانونی مقبروں کو بلڈوز کر کے منہدم کر دیا۔ یہ کارروائی جمعرات کی صبح ایس ڈی ایم ابھے پرتاپ سنگھ کی قیادت میں کی گئی۔

بتایا گیا کہ جن مقبروں کو ہٹایا گیا وہ سرکاری آم باغ کی اراضی پر بنائے گئے تھے۔ انتظامیہ نے قبل ازیں نوٹس جاری کرکے درست دستاویزات جمع کرانے کا موقع دیا تھا تاہم مقررہ مدت میں کوئی بھی درست دستاویزات جمع نہیں کروائی گئیں۔

وزیر اعلیٰ دھامی کی قیادت میں ریاست بھر میں اب تک 537 غیر قانونی مقبروں کو ہٹایا گیا ہے۔ ریاستی حکومت کا پیغام واضح ہے کہ اتراکھنڈ میں عقیدے کا احترام کیا جائے گا، لیکن اس کا غلط استعمال کسی بھی قیمت پر برداشت نہیں کیا جائے گا۔ جو بھی سرکاری اراضی پر مذہب کے نام پر نیلی اور پیلی چادر لگا کر قبضہ کرنے کی کوشش کرے گا اس کے خلاف سخت کارروائی کی جائے گی۔

ریاستی حکومت اس بات کو یقینی بنا رہی ہے کہ کوئی بھی بدنیتی کا ارادہ اتراکھنڈ کی قدرتی دولت اور ثقافتی ورثے پر قبضہ نہ کر سکے۔ کنڈیشوری میں ہونے والی کارروائی نے واضح کر دیا ہے کہ یہاں کی حکمرانی صرف کاغذوں تک محدود نہیں ہے، بلکہ مضبوط ارادے کے ساتھ زمین پر کارروائی بھی کی جا رہی ہے۔

---------------

ہندوستان سماچار / عبدالسلام صدیقی