نئی دہلی، 03 جولائی (ہ س)۔ ملک میں واٹر گیمز کو فروغ دینے کی ایک بڑی پہل کے طور پر، پہلا 'کھیلو انڈیا واٹر گیمز فیسٹیول' 21 اگست سے 23 اگست تک سری نگر کی مشہور ڈل جھیل کی خوبصورت وادیوں میں منعقد کیا جائے گا، جہاں ملک بھر کے کھلاڑی پانی کے مختلف کھیلوں میں اپنی مہارت کا مظاہرہ کریں گے۔

اس فیسٹیول کا بنیادی مقصد ملک میں واٹر گیمز کو فروغ دینا اور نوجوانوں میں ان کھیلوں کی رسائی اور مقبولیت کو مضبوط بنانا ہے۔ اس ایونٹ میں ملک کی 36 ریاستوں اور مرکز کے زیر انتظام علاقوں کے 400 سے زیادہ کھلاڑیوں کی شرکت متوقع ہے۔ اس تین روزہ ایونٹ میں کل 5 بڑے واٹر گیمز کے مقابلوں کا انعقاد کیا جائے گا، جن میں کائکنگ اور کینوئنگ (پیڈل کے ساتھ چھوٹی کشتیوں کو چلانا)، روئنگ، واٹر اسکیئنگ (پانی کی سطح پر تیزی سے کھینچنے کا کھیل)، شکارا ریس، ڈریگن بوٹ ریس شامل ہیں۔

اس مقابلے میں اوپن ایج کیٹیگری کے کھلاڑی حصہ لیں گے۔ ان کا انتخاب قومی کھیلوں کی فیڈریشن کی جانب سے قومی مقابلوں یا دیگر تسلیم شدہ مقابلوں میں ان کی کارکردگی کی بنیاد پر کیا جائے گا۔ اس کے علاوہ اسپورٹس ٹیکنیکل اسٹیئرنگ کمیٹی بھی میرٹ کی بنیاد پر حتمی فیصلہ کرے گی۔ ملک بھر سے کھلاڑیوں اور تماشائیوں کی شرکت سے یہ ایونٹ نہ صرف واٹر گیمز کا قومی پلیٹ فارم بن جائے گا بلکہ اس سے وادی کشمیر میں کھیلوں کی سیاحت کو بھی نئی زندگی ملے گی۔ یہ 'کھیلو انڈیا واٹر گیمز فیسٹیول' کا پہلا ایڈیشن ہے اور مستقبل میں اسے ملک کے دیگر حصوں میں بھی منعقد کرنے کا منصوبہ ہے۔

---------------

ہندوستان سماچار / عبدالسلام صدیقی