نئی دہلی، 27 جولائی (ہ س)۔ دہلی اسمبلی کے اسپیکر وجیندر گپتا نے آج راجیہ سبھا کے ڈپٹی چیئرمین ہری ونش نارائن سنگھ سے رسمی ملاقات کی۔ اس موقع پر گپتا نے ڈپٹی چیئرمین کو دہلی اسمبلی میں چل رہے مختلف تبدیلی کے کاموں کے بارے میں جانکاری دی۔ انہوں نے اسمبلی کو ایک مثالی جمہوری ادارے کے طور پر ترقی دینے کے لیے اپنائے جانے والے ایکشن پلان سے آگاہ کیا۔

وجیندر گپتا نے بتایا کہ دہلی ودھان سبھا میں نیشنل ای-ودھان ایپلیکیشن (نیوا) کے نفاذ کا عمل تیزی سے آگے بڑھ رہا ہے اور امکان ہے کہ یہ آئندہ مانسون اجلاس سے پہلے مکمل ہو جائے گا۔ یہ پروجیکٹ ایوان کی کارروائی اور قانون سازی کے دستاویزات تک آسان ڈیجیٹل رسائی کو یقینی بنائے گا، تاکہ ودھان سبھا کا پورا کام ڈیجیٹل فارمیٹ میں چلایا جاسکے۔

انہوں نے مزید بتایا کہ ماحولیاتی پائیداری کے تئیں اپنی وابستگی کے ایک حصے کے طور پر، ودھان سبھا کے احاطے میں 500 کلو واٹ کا سولر پاور پلانٹ نصب کیا گیا ہے، جسے جلد ہی فعال کر دیا جائے گا۔ اس کے ذریعے دہلی ودھان سبھا مکمل طور پر شمسی توانائی پر مبنی ہو جائے گی، اور یہ ملک کی پہلی گرین ودھان سبھا کے طور پر ایک متاثر کن مثال قائم کرے گی۔

اس کے علاوہ اسپیکر نے بتایا کہ ودھان سبھا لائبریری کے ڈیجیٹائزیشن کا کام بھی جاری ہے جس کا مقصد ایم ایل اے اور ملازمین کو تحقیق اور تاریخی ریکارڈ تک آسان اور جدید رسائی فراہم کرنا ہے۔ دہلی قانون ساز اسمبلی کمپلیکس کو قومی اہمیت کے حامل تاریخی ورثے کے طور پر تیار کرنے کے لیے بھی ٹھوس منصوبے بنائے جا رہے ہیں، تاکہ اس تاریخی عمارت کے فن تعمیر اور جمہوری ورثے کو محفوظ رکھا جا سکے۔

گپتا نے کہا کہ یہ تمام اقدامات دہلی قانون ساز اسمبلی کو ڈیجیٹل طور پر بااختیار، ماحول دوست اور ثقافتی اعتبار سے بھرپور ادارے کے طور پر قائم کرنے کے وسیع تر وژن کا حصہ ہیں۔ ان کوششوں سے ملک کی دیگر قانون ساز اسمبلیوں کے ساتھ تعاون اور جمہوری ترقی کو بھی فروغ ملے گا۔

راجیہ سبھا کے ڈپٹی چیئرمین ہری ونش نارائن سنگھ نے اسمبلی اسپیکر وجیندر گپتا کے ان اقدامات کی تعریف کی اور یقین ظاہر کیا کہ یہ کوششیں نہ صرف ریاستی سطح پر جمہوری عمل کو تقویت دیں گی بلکہ ملک کی دیگر قانون ساز اسمبلیوں کے لیے بھی متاثر کن ثابت ہوں گی۔

---------------

ہندوستان سماچار / عبدالسلام صدیقی