جموں, 27 جولائی (ہ س)جموں ڈیولپمنٹ اتھارٹی نے ایک بڑی انسداد تجاوزات کارروائی کے دوران نگروٹہ میں جموں-سرینگر قومی شاہراہ کے قریب واقع 15 کنال قیمتی سرکاری اراضی غیر قانونی قبضے سے بازیاب کرالی۔

سرکاری ترجمان کے مطابق، یہ کارروائی جے ڈی اے اور ضلع انتظامیہ جموں کی مشترکہ کوششوں سے عمل میں لائی گئی، جس کا مقصد غیر قانونی کان کنی اور اراضی پر ناجائز قبضوں کے خلاف مؤثر کارروائی تھا۔

ترجمان نے بتایا کہ بازیاب کی گئی اراضی حساس نوعیت کی ہے اور اس پر لینڈ مافیا کی جانب سے نہ صرف غیر قانونی قبضہ کیا گیا تھا بلکہ ماحولیاتی نقصان دہ سرگرمیوں، بالخصوص غیر مجاز کان کنی، میں بھی ملوث پائے گئے۔ انہوں نے کہا کہ اس عمل سے نہ صرف قیمتی سرکاری وسائل کو نقصان پہنچا بلکہ عوامی مفادات کو بھی خطرے میں ڈالا گیا۔

متعلقہ حکام کے مطابق، ملوث عناصر کے خلاف قانونی کارروائی جلد شروع کی جائے گی جبکہ دوبارہ تجاوزات کو روکنے کے لیے علاقے میں نگرانی کو مزید سخت کر دیا گیا ہے۔دریں اثنا، جے ڈی اے کی ایک اور ٹیم نے بشنہ کے قریب رنگ روڈ پر تعمیر کی گئی غیر قانونی عارضی تعمیرات کو بھی مسمار کر دیا۔

جے ڈی اے نے عوام سے اپیل کی ہے کہ وہ غیر قانونی تعمیرات یا تجاوزات کی صورت میں فوری اطلاع دیں تاکہ شہر میں اراضی کے شفاف اور ذمہ دارانہ انتظام کو یقینی بنایا جا سکے۔

ہندوستھان سماچار

ہندوستان سماچار / محمد اصغر