اس وقت مسٹر پرفیکشنسٹ عامر خان کی بہت زیادہ انتظار کی جانے والی فلم 'ستارے زمین پر' کے کافی چرچے ہیں۔ ٹریلر ریلیز ہونے کے بعد تنقیدوں میں گھری یہ فلم بالآخر جمعہ 20 جون 2025 کو ریلیز ہو گئی۔ فلم نے تین دنوں میں خوب کمائی کی ہے۔ عامر کی فلم 'لال سنگھ چڈھا' فلاپ رہی جس کے بعد وہ بڑے پردے سے دور ہو گئے تھے۔ اب تین سال بعد عامر کی ایک بار پھر سلور اسکرین پر واپسی ہوئی ہے۔ ان دنوں وہ فلم ’ستارے زمین پر‘ کی تشہیر زوروشور سے کر رہے ہیں۔ 'ستارے زمین پر' عامر خان کے کیرئیر کی ایک اہم فلم ہے۔ فلم کی تیسرے دن کی کمائی سامنے آگئی ہے۔

عامر خان اور جینیلیا دیش مکھ کی فلم ستارے زمین پر کو ناقدین اور ناظرین کی جانب سے مثبت ردعمل ملا ہے۔ فلم نے باکس آفس پر اچھی شروعات کی ہے۔ باکس آفس ٹریکر ساکنلک کے مطابق، ستارے زمین پر نے اپنی ریلیز کے تیسرے دن یعنی اپنے پہلے اتوار کو 29 کروڑ روپے کمائے، جس سے باکس آفس پر اس کا کل مجموعہ 59.90 کروڑ روپے ہو گیا۔ ستارے زمین پر نے باکس آفس پر 10.7 کروڑ روپے کے ساتھ شاندار آغاز کیا تھا، جب کہ دوسرے دن فلم 20.2 کروڑ روپے کمانے میں کامیاب رہی۔ ستارے زمین پر، جس کا بجٹ تقریباً 80 کروڑ روپے تھا، صرف تین دنوں میں اپنے بجٹ کا نصف سے زیادہ کما چکا ہے۔

فلم ستارے زمین پر کی ہدایت کاری آر ایس پرسنا نے کی ہے، جب کہ اسے عامر خان نے اپنی سابق اہلیہ کرن راؤ کے ساتھ پروڈیوس کیا ہے۔ فلم میں جنیلیا ڈی سوزا عامر خان کی اہلیہ سنیتا کے کردار میں نظر آئیں گی۔ یہ کہانی ڈاؤن سنڈروم کے ساتھ جدوجہد کرنے والے نوجوانوں اور ان کے کوچ کے جذباتی سفر کو بیان کرتی ہے۔ یہ فلم مشہور فرانسیسی فلم چیمپیئنز کی سرکاری ہندی شکل ہے۔ اس میں عامر نے گلشن نامی ایک متنازع باسکٹ بال کوچ کا کردار ادا کیا ہے جسے بہتری کے لیے خصوصی بچوں کی ٹیم کی تربیت کی ذمہ داری دی گئی ہے۔

---------------

ہندوستان سماچار / عبدالسلام صدیقی