مشہور اداکار اور گلوکار دلجیت دوسانجھ کے گانے دنیا بھر میں مشہور ہیں۔ اپنے پنجابی گانوں کے ساتھ ساتھ وہ بالی ووڈ کی کچھ فلموں میں بھی نظر آئے ہیں۔ یہی وجہ ہے کہ ان کے مداحوں کی تعداد بہت زیادہ ہے۔ اپنے گانوں اور اداکاری کی وجہ سے مداحوں میں ہمیشہ سراہا جانے والے دلجیت اس وقت ٹرول ہو رہے ہیں۔ اس کی وجہ یہ ہے کہ انہوں نے اپنی ایک فلم کا ٹریلر پاکستانی اداکارہ کے ساتھ شیئر کیا ہے۔ جس کی وجہ سے دلجیت تنازعات میں گھر گئے ہیں۔
دلجیت کی آنے والی فلم 'سردار جی-3' 27 جون کو دنیا بھر میں ریلیز کی جائے گی۔اس میں دلجیت مرکزی کردار میں نظر آئیں گے۔ تاہم انہوں نے جو ٹریلر شیئر کیا ہے اس میں پاکستانی اداکارہ ہانیہ عامر بھی ہیں۔ اس فلم میں ان کے ساتھ ہانیہ مرکزی کردار میں نظر آئیں گی۔ 22 اپریل کو پہلگام حملے کے بعد بھارت میں تمام پاکستانی فنکاروں کے اکاؤنٹس پر پابندی لگا دی گئی تھی۔ اس وقت اداکارہ وانی کپور اور پاکستانی اداکار فواد خان کی فلم ’عبیر گلال‘ بھی خبروں میں تھی۔ تاہم بھارت میں اس فلم پر بھی پابندی عائد کر دی گئی تھی۔ جس کی وجہ سے فلم ریلیز نہیں ہو سکی۔ اس کے بعد دلجیت نے ہانیہ عامر کے ساتھ فلم کا ٹریلر سوشل میڈیا پر شیئر کیا اور نیٹیزنز نے انہیں تبصروں کے ذریعے خوب ٹرول کیا۔
رپورٹس کے مطابق دلجیت دوسانجھ نے پہلگام دہشت گردانہ حملے سے قبل 'سردار جی 3' کی شوٹنگ مکمل کر لی تھی۔ انہوں نے حال ہی میں اس فلم کا ٹریلر اپنے سوشل میڈیا اکاؤنٹ پر شیئر کیا۔ خاص بات یہ ہے کہ یہ فلم بھارت میں ریلیز نہیں ہوگی بلکہ اسے بین الاقوامی سطح پر ریلیز کیا جائے گا۔ تاہم ٹریلر میں پاکستانی اداکارہ ہانیہ عامر کی موجودگی کو دیکھ کر بہت سے ناظرین ناراض ہو گئے ہیں۔ غور طلب ہے کہ پہلگام میں حالیہ دہشت گردانہ حملے میں 26 ہندوستانی سیاح مارے گئے تھے۔ اس حملے کے بعد بھارتی حکومت نے سخت ایکشن لیتے ہوئے تمام پاکستانی فنکاروں کے سوشل میڈیا اکاؤنٹس پر پابندی لگا دی تھی۔ اس پس منظر میں جب ہانیہ عامر 'سردار جی 3' کے ٹریلر میں نظر آئیں تو سوشل میڈیا پر شدید احتجاج کیا گیا۔ کئی صارفین نے دلجیت دوسانجھ سے جواب طلب کیا اور اس فیصلے پر ناراضگی کا اظہار کیا۔ اس تنازع کی وجہ سے دلجیت ایک بار پھر ناقدین کے نشانے پر ہیں۔
اس دوران دلجیت سنی دیول کی فلم 'بارڈر 2' میں بھی نظر آئیں گے۔ یہی وجہ ہے کہ جہاں ایک طرف وہ اس حب الوطنی پر مبنی فلم پر کام کر رہے ہیں وہیں دوسری جانب پاکستانی اداکارہ ہانیہ عامر مرکزی کردار ادا کرنے والی اس فلم کے ٹریلر کو ریلیز کرنے پر اداکار کو ٹرول کیا جا رہا ہے۔
---------------
ہندوستان سماچار / عبدالسلام صدیقی
