سلمان خان شادی کب کریں گے؟ یہ سوال برسوں سے لوگوں کے ذہنوں میں ہے۔ 59 سال کی عمر میں بھی سلمان کے مداحوں کو امید ہے کہ شاید ایک دن ان کے پسندیدہ اسٹار کی شادی ہوجائے گی۔ سنگیتا بجلانی سے لے کر ایشوریہ رائے اور کترینہ کیف تک ان کا نام کئی حسیناو¿ں سے جوڑا گیا لیکن کوئی رشتہ شادی کے مرحلے تک نہ پہنچ سکا۔ اب حال ہی میں سلمان خان نے ایک انٹرویو میں اس معاملے پر کھل کر بات کی ہے جس سے ایک بار پھر یہ بحث تیز ہو گئی ہے کہ دبنگ خان آخر کب سنبھلیں گے۔ دراصل، حال ہی میں سلمان خان 'دی گریٹ انڈین کپل شو' میں نظر آئے، جہاں ان سے ان کی ذاتی زندگی کے بارے میں سوالات کیے گئے۔ جب کپل شرما نے ان سے پوچھا کہ کیا ان کی زندگی میں کوئی خاص لڑکی ہے تو سلمان نے مسکراتے ہوئے جواب دیا کہ میری زندگی میں اس وقت کوئی نہیں ہے اور اگر میں سچ کہوں تو اب مجھ میں اتنا صبر نہیں ہے کہ میں کسی کے لیے اتنی قربانی دے سکوں اور نہ ہی میاں بیوی کی لڑائیاں برداشت کروں۔ ان کا مزید کہنا تھا کہ ’میں اب اس مقام پر ہوں جہاں مجھے اپنی زندگی اور تنہائی پسند ہے، میں اسے کسی کے ساتھ شیئر کرنے کے لیے تیار نہیں ہوں‘۔ ان کے اس بیان سے ایک بار پھر واضح ہوگیا کہ سلمان فی الحال شادی کے موڈ میں نہیں ہیں۔

سلمان خان نے حال ہی میں ایک شو کے دوران اپنی صحت کے حوالے سے چونکا دینے والے انکشافات کیے ہیں۔ انہوں نے کہا، میرے جسم میں بہت سے مسائل ہیں۔ ہڈیاں روز ٹوٹ رہی ہیں، پسلیاں بھی ٹوٹ گئی ہیں۔ میں ٹرائیجیمنل نیورلجیا جیسی تکلیف دہ بیماری کے ساتھ کام کر رہا ہوں۔ میرے دماغ میں اینیوریزم ہے، اے وی میلفارمیشن ہے، اس کے باوجود میں اداکاری، رقص، سب کچھ کر رہا ہوں۔ اس کے بعد انہوں نے مذاق میں شادی کی بات کرتے ہوئے کہا کہ ”اگر میں اس عمر میں شادی کروں اور میرا موڈ خراب ہوگیا تو میری بیوی ہماری آدھی دولت لے جائے گی، اگر یہ سب چھوٹی عمر میں ہوتا تو ٹھیک تھا، میں پھر کما لیتا، لیکن اب…“ سلمان کے بے تکلف جواب نے ایک بار پھر ثابت کردیا کہ وہ اپنی زندگی کے بارے میں بہت واضح ہیں اور کھلے دل سے کہتے ہیں کہ وہ کیا محسوس کرتے ہیں۔

سلمان خان کو سال 2011 میں اپنی زندگی کی ایک انتہائی سخت جنگ کا سامنا کرنا پڑا۔ اس دوران وہ ٹرائیجیمینل نیورلجیا نامی ایک سنگین بیماری میں مبتلا ہو گئے۔ اس بیماری میں چہرے کے اعصاب میں ناقابل برداشت اور جھٹکا دینے والا درد ہوتا ہے جو مریض کی ذہنی حالت کو بھی بری طرح متاثر کرتا ہے۔ فلم 'ٹیوب لائٹ' کے پروموشن کے دوران سلمان نے اس بیماری کے بارے میں بات کی۔ سلمان نے اپنی بیماری کے بارے میں کھل کر بات کی تھی۔ انہوں نے بتایا تھا کہ اس درد کی وجہ سے انہیں کئی بار خودکشی کے خیالات آنے لگے تھے۔ درد اتنا ناقابل برداشت تھا کہ جینا مشکل ہو گیا تھا۔ اس بیماری کی تشخیص کے بعد سلمان علاج کے لیے امریکہ چلے گئے جہاں ان کی سرجری ہوئی۔ اس کے بعد ان کی حالت میں کافی بہتری آئی لیکن انہوں نے یہ بھی اعتراف کیا کہ یہ تجربہ ان کی زندگی کا سب سے تکلیف دہ مرحلہ تھا۔

ہندوستھان سماچار

ہندوستان سماچار / عطاءاللہ