وزیر اعظم مودی آج اور کل بہار، اڈیشہ، آندھرا پردیش کے دورے پر

نئی دہلی، 20 جون (ہ س)۔ وزیر اعظم نریندر مودی آج اور کل ملک کی تین ریاستوں بہار، اڈیشہ اور آندھرا پردیش کا دورہ کریں گے۔ وزیر اعظم آج بہار کے سیوان کا دورہ کریں گے اور دوپہر 12 بجے کے قریب کئی ترقیاتی پروجیکٹوں کا افتتاح اور سنگ بنیاد رکھیں گے۔ اس موقع پر وہ ایک جلسہ عام سے بھی خطاب کریں گے۔ اس کے بعد وزیر اعظم مودی اڈیشہ کے بھونیشور جائیں گے اور شام تقریباً 4.15 بجے اڈیشہ حکومت کے ایک سال مکمل ہونے کے موقع پر منعقدہ ریاستی سطح کی تقریب کی صدارت کریں گے۔ وہ 18,600 کروڑ روپے سے زیادہ کے کئی ترقیاتی منصوبوں کا افتتاح اور سنگ بنیاد بھی رکھیں گے۔ وزیر اعظم مودی اس موقع پر موجود لوگوں سے خطاب کریں گے۔

اگلے دن ہفتہ کو وزیر اعظم آندھرا پردیش کے وشاکھاپٹنم میں تقریباً 6.30 بجے بین الاقوامی یوم یوگا کے موقع پر بڑے پیمانے پر یوگا کے مظاہرے میں حصہ لیں گے۔ وزیر اعظم مودی کے دو روزہ پروگرام کی تفصیلات حکومت ہند نے دورہ شروع کرنے سے قبل کی شام ایک پریس ریلیز میں جاری کی ہیں۔ بھارتیہ جنتا پارٹی (بی جے پی) نے آج کا پروگرام اپنے ہینڈل پر شیئر کیا ہے۔

بہار میں ریلوے کے بنیادی ڈھانچے کو فروغ دیتے ہوئے، وزیر اعظم 400 کروڑ روپے سے زیادہ کی لاگت والے نئے ویشالی-دیوریا ریل لائن پروجیکٹ کا افتتاح کریں گے اور اس روٹ پر ایک نئی ٹرین سروس کو ہری جھنڈی دکھائیں گے۔ مزید برآں، شمالی بہار میں رابطے کو بڑھانے کے لیے، وزیر اعظم پاٹلی پترا اور گورکھپور کے درمیان مظفر پور اور بیتیا کے راستے وندے بھارت ایکسپریس کو بھی ہری جھنڈی دکھائیں گے۔ وزیر اعظم نریندر مودی بہار میں پی ایم اے وائی یو کے 53,600 سے زیادہ استفادہ کنندگان کو پہلی قسط بھی جاری کریں گے۔ وہ پی ایم اے وائی یو کے 6,600 سے زیادہ مکمل شدہ مکانات کی گرہ پرویش تقریب کے موقع پر کچھ مستفیدین کو چابیاں بھی سونپیں گے۔

وزیر اعظم اڈیشہ حکومت کے ایک سال کی تکمیل کے موقع پر اڈیشہ کے بھونیشور میں ایک ریاستی سطح کی تقریب کی صدارت کریں گے۔اڈیشہ کی مجموعی ترقی کے عزم کے مطابق، پی ایم مودی 18,600 کروڑ روپے سے زیادہ کے کئی ترقیاتی پروجیکٹوں کا افتتاح اور سنگ بنیاد بھی رکھیں گے۔ ان منصوبوں میں پینے کے پانی، آبپاشی، زراعت کے بنیادی ڈھانچے، صحت کے بنیادی ڈھانچے، دیہی سڑکوں اور پلوں، قومی شاہراہوں کے حصے اور ایک نئی ریلوے لائن سمیت اہم شعبوں کا احاطہ کیا جائے گا۔

وزیر اعظم نریندر مودی آندھرا پردیش کے وشاکھاپٹنم سے یوگا کے 11ویں بین الاقوامی دن (آئی ڈی وائی) کے موقع پر قومی تقریبات کی قیادت کریں گے۔ وہ وشاکھاپٹنم کے ساحل پر کامن یوگا پروٹوکول (سی وائی پی) سیشن میں تقریباً پانچ لاکھ شرکاء کے ساتھ شرکت کریں گے جبکہ ہم آہنگ یوگا مظاہرے میں قوم کی قیادت کریں گے۔ یوگا سنگم تقریبات ہندوستان بھر میں 3.5 لاکھ سے زیادہ مقامات پر بیک وقت منعقد کی جائیں گی۔ اس سال بڑے پیمانے پر شرکت کی حوصلہ افزائی کے لیے مائی گورنمنٹ اور مائی بھارت جیسے پلیٹ فارمز پر یوگا ود فیملی اور یوگا ان پلگڈ کے تحت نوجوانوں پر مرکوز اقدامات جیسے خصوصی مقابلے متعارف کرائے گئے ہیں۔

ہندوستھان سماچار

---------------

ہندوستان سماچار / انظر حسن