مرشدآباد، 15 جون (ہ س)۔ مرشد آباد کے شمشیر گنج میں ہفتہ کی رات بی ایس ایف کے ایک جوان نے دوسرے جوان کو گولی مار کر ہلاک کر دیا۔ مرنے والے کی شناخت رتن سنگھ کے طور پر کی گئی ہے۔ رتن کی لاش کو پوسٹ مارٹم کے لیے جنگی پور مہاکما اسپتال بھیج دیا گیا ہے۔ پولیس نے ملزم بی ایس ایف جوان کو گرفتار کر لیا ہے۔ خصوصی ذرائع کے مطابق، ہفتہ کی رات شمشیر گنج میں ڈیوٹی کے دوران دو بی ایس ایف جوانوں میں جھگڑا ہوا۔ اس دوران بی ایس ایف کے ایک جوان نے اپنے ساتھی رتن کو گولی مار دی۔ اس واقعہ نے شمشیر گنج کے پہاڑ گھاٹی علاقے میں ہلچل مچادی۔ گولی لگنے سے زخمی رتن کو تشویشناک حالت میں انوپ نگر اسپتال میں داخل کرایا گیا۔ وہاں سے انہیں جنگی پور مہاکما اسپتال لے جایا گیا۔ رتن کی وہیں علاج کے دوران موت ہو گئی۔ قابل ذکر ہے کہ وقف تحریک کے پیش نظر شمشیر گنج میں بی ایس ایف کے اضافی جوانوں کو تعینات کیا گیا ہے۔ دونوں رات کو وہاں ڈیوٹی پر تھے۔ ذرائع کے مطابق فائرنگ دونوں کے درمیان جھگڑے کے باعث ہوئی۔ حالانکہ خبر لکھے جانے تک بی ایس ایف کی طرف سے کوئی ردعمل سامنے نہیں آیا تھا لیکن جنگی پور ضلع پولیس کے ایک سینئر افسر نے واقعہ کی سچائی کو قبول کر لیا ہے۔

---------------

ہندوستان سماچار / عبدالسلام صدیقی