اداکار عامر خان جلد ہی فلم ’ستارے زمین پر‘ میں نظر آئیں گے۔ اس میں وہ معذور بچوں کے باسکٹ بال کوچ کا کردار ادا کر رہے ہیں۔ فلم کے ٹریلر میں عامر کی ماں انہیں 'ٹنگو' کہتے ہوئے نظر آ رہی ہیں۔ عامر کو اکثر ان کے چھوٹے قد کی وجہ سے چھیڑا جاتا ہے۔ اب انہوں نے انکشاف کیا ہے کہ اپنے کیرئیر کے آغاز میں ہی وہ اپنے چھوٹے قد کی وجہ سے احساس کمتری کا شکار تھے۔

ایک انٹرویو میں عامر خان سے پوچھا گیا کہ کیا وہ اب اپنا مذاق اڑانے میں آسانی محسوس کرتے ہیں؟ اس پر ان کا کہنا تھا کہ 'جاوید صاحب نے ایک بار مجھے مزاح کے بارے میں بتایا تھا، جسے میں سمجھتا ہوں، انھوں نے کہا کہ جب آپ زندگی کے مشکل دور سے گزر رہے ہوں تو آپ کو مزاح کو ہینڈل کرنے کا طریقہ معلوم ہونا چاہیے، ایک بار جب آپ اسے سمجھ لیں تو یہ آپ کو حیران نہیں کرے گا، مجھے لگتا ہے کہ میں ہمیشہ سے ایسا کر پایا ہوں اور میں نے اسے فلم میں بھی اجاگر کیا ہے۔' ان کا مزید کہنا تھا کہ اپنے کیرئیر کے آغاز میں میں بہت ڈرا ہوا تھا۔ اس وقت امیتابھ بچن پہلے نمبر پر تھے اور ان کا قد چھ فٹ سے زیادہ تھا۔ ونود جی، شتروگھن سنہا، سبھی لمبے تھے، میں نے سوچا کہ مجھ جیسا چھوٹا آدمی یہاں کچھ نہیں کر پائے گا۔ میں اس بات کو لے کر بہت دباؤ میں تھا، لیکن بعد میں سب کچھ ٹھیک ہو گیا۔ ستارے زمین پر 20 جون کو ریلیز ہونے جا رہی ہے۔ یہ ایک ہسپانوی فلم کا ریمیک ہے۔ اس فلم میں جنیلیا ڈی سوزا بھی مرکزی کردار میں ہیں۔ اس میں آیوش بھنسالی، رشی ساہنی، رشبھ جین، نمن مشرا، ویدانت شرما، سنوت دیسائی، آروش دتہ، گوپی کرشنا ورما، آشیش پینڈسے اور سمرن منگیشکر بھی ہیں۔

---------------

ہندوستان سماچار / عبدالسلام صدیقی