واشنگٹن ،10جون(ہ س)۔امریکی صدر ڈونلڈ ٹرمپ نے پیر کو کہا ہے کہ ایران ان مذاکرات میں شامل ہے جن کا مقصد اسرائیل اور حماس کے درمیان قیدیوں کے بدلے جنگ بندی معاہدہ طے کرنا ہے۔ ٹرمپ نے وائٹ ہاوس کے سٹیٹ ڈائننگ روم میں ایک تقریب کے دوران صحافیوں سے گفتگو کرتے ہوئے کہا، غزہ اس وقت ہمارے اور حماس اور اسرائیل کے درمیان وسیع پیمانے پر مذاکرات کے وسط میں ہے۔ ایران درحقیقت اس میں شامل ہے اور ہم دیکھیں گے کہ غزہ کے ساتھ کیا ہونے والا ہے۔ ہم قیدیوں کو واپس لانا چاہتے ہیں۔ٹرمپ نے اس معاملے کی وضاحت نہیں کی اور وائٹ ہاوس نے مذاکرات میں ایران کے شامل ہونے کی تفصیلات کے لیے درخواست کا فوری جواب نہیں دیا۔ نیویارک میں اقوامِ متحدہ میں ایران کے مشن نے بھی تبصرے کی درخواست کا فوری جواب نہیں دیا۔امریکہ نے اسرائیل اور حماس کے درمیان 60 روزہ جنگ بندی کی تجویز پیش کی ہے۔ اسرائیل نے کہا کہ وہ شرائط کی پابندی کرے گا لیکن حماس نے ابھی تک اس منصوبے کو مسترد کیا ہے۔اس تجویز کے تحت 28 اسرائیلی زندہ اور مردہ قیدیوں کو پہلے ہفتے میں 1,236 فلسطینی قیدیوں اور 180 مردہ فلسطینیوں کی باقیات کے بدلے رہا کیا جائے گا۔امریکہ اور ایران الگ مذاکرات میں تہران کے جوہری پروگرام پر ایک معاہدہ طے کرنے کی کوشش کر رہے ہیں۔ہندوستھان سماچار

ہندوستان سماچار / Mohammad Khan