اداکارہ دیپیکا پادوکون نے گزشتہ سال ستمبر میں بیٹی کو جنم دیا، جس کا نام انہوں نے 'دعا' رکھا۔ 39 سال کی عمر میں ماں بننے والی دیپیکا نے اس تجربے کو بہت خاص لیکن چیلنجنگ قرار دیا ہے۔ اپنی حمل کے دوران، دیپیکا نے چند عوامی تقریبات میں حصہ لیا اور ابتدائی مہینوں میں فلم 'سنگھم اگین' کی شوٹنگ بھی کی۔

حال ہی میں دیپیکا نے ایک انٹرویو میں بتایا کہ گزشتہ دو ماہ ان کے لیے بہت مشکل رہے ہیں۔ انہوں نے کہا کہ یہ دور جسمانی اور جذباتی طور پر بہت تھکا دینے والا تھا لیکن بیٹی دعا کی آمد سے سب کچھ خوبصورت ہو گیا ہے۔ ایک میگزین کو دیے گئے انٹرویو میں دیپیکا پادوکون نے اپنے حمل کے سفر کو بہت چیلنجنگ بتایا۔ ان کا کہنا تھا کہ یہ سفر میرے لیے آسان نہیں تھا۔ مجھے بہت سی پیچیدگیوں سے گزرنا پڑا، خاص طور پر آٹھویں اور نویں مہینے میں۔ اس دوران مجھے ذہنی اور جسمانی طور پر بہت کچھ برداشت کرنا پڑا۔

ماں بننے کے احساس کے بارے میں بات کرتے ہوئے دیپیکا نے کہا کہ مجھے یہ اس وقت محسوس ہوا جب میری چھوٹی بہن کی پیدائش ہوئی، تب سے میرے اندر ماں کا احساس بڑھنے لگا، اس کا خیال رکھنا، اسے محفوظ رکھنا میرے لیے فطری بات تھی۔ماں بننے کے لیے مجھ پر کبھی کوئی سماجی دباؤ نہیں تھا، میں صرف صحیح وقت کا انتظار کر رہی تھی۔

انہوں نے مزید کہا کہ میں نہیں جانتی کہ میں پہلے جیسا کام کر سکوں گی یا نہیں۔ اس وقت دعا میری پہلی ترجیح ہے، لیکن میں خود سے کہتی رہتی ہوں کہ ماں بننے کے بعد زندگی نہیں رکتی، اس لیے میں نے خود سے کہا کہ مجھے دوبارہ کام شروع کر دینا چاہیے، لیکن جب بھی میں دعا کو چھوڑ کر گھر سے باہر جاتی ہوں تو مجھے لگتا ہے کہ مجھ سے کوئی غلطی ہو گئی ہے۔

---------------

ہندوستان سماچار / عبدالسلام صدیقی