نئی دہلی، 3 مئی (ہ س)۔ تعمیرات عامہ کے وزیر پرویش صاحب سنگھ ورما نے ہفتہ کو گولف لنک علاقے کا دورہ کیا اور وہاں جاری ڈرین، سیوریج لائن اور سم -ویل کی تعمیر کے کاموں کا معائنہ کیا۔ اس موقع پر بی جے پی رکن پارلیمنٹ بانسوری سوراج بھی موجود تھیں۔
وزیر پرویش ورما نے کہا کہ نئی دہلی میونسپل کونسل کے تحت تمام ضروری ورک آرڈر جاری کر دیے گئے ہیں اور تمام کام 30 مئی تک مکمل کر لیے جائیں گے۔انہوں نے کہا کہ اس بار مانسون کے دوران پانی جمع نہیں ہوگا۔
انہوں نے کہا کہ ہم نے آج گولف لنکس کے علاقے کا دورہ کیا کیونکہ اس پورےعلاقے گزشتہ مانسون کے دوران پانی جمع ہو گیا تھا۔ اس بار ہم پوری طرح تیار ہیں۔ این ڈی ایم سی نے تمام ضروری ورک آرڈر جاری کر دیے ہیں اور کام تیز رفتاری سے جاری ہے۔
معائنے کے دوران انہوں نے کہا کہ یہاں تین نئے سم ویلز بنائے جا رہے ہیں جہاں پر پہلے سے ہی پمپس لگائے گئے ہیں تاکہ بارش کا پانی براہ راست نالوں میں ڈالا جا سکے۔ اس کے علاوہ گزشتہ 10 دنوں سے ’سپر سکر‘ مشین کے ذریعے صفائی کا سخت کام بھی کیا جا رہا ہے۔
وزیر نے کہا کہ تمام کام مقررہ ہدف کے مطابق ہو رہا ہے۔ جمعہ کی بارش ہمارے لیے وارننگ تھی، اس لیے تمام اہلکار موقع پر موجود ہیں اور وقت سے پہلے کام مکمل کرنے کے لیے کوشاں ہیں۔ اس بار دہلی کے کسی بھی علاقے کو پانی بھرنے کا سامنا نہیں کرنا پڑے گا۔
انہوں نے کہا کہ جمعہ کی صبح 8:30 بجے تک دہلی میں 78 ملی میٹر بارش درج کی گئی، جو 1901 کے بعد مئی کے مہینے میں 24 گھنٹے کی دوسری سب سے زیادہ بارش تھی۔ ہندوستان کے محکمہ موسمیات کے مطابق 20 مئی 2021 کو سب سے زیادہ بارش 119.3 ملی میٹر ریکارڈ کی گئی۔
وزیر پرویش ورما نے کہا کہ دہلی کے تمام علاقوں میں نالوں کی صفائی کا کام تیزی سے جاری ہے۔ انہوں نے کہا کہ حکومت کا واضح ہدف ہے کہ دہلی کے تمام نالوں کی صفائی 30 مئی تک مکمل کر لی جائے۔
انہوں نے کہا کہ ہمارا مقصد ہر نالے کی صفائی، ہر مسئلہ کا حل اور مانسون کی پہلی بارش سے قبل مکمل تیاریاں کرنا ہے۔ پی ڈبلیو ڈی اور واٹر بورڈ کے اہلکار سڑکوں کا معائنہ کر رہے ہیں۔
وزیر پرویش ورما نے آج بی کے دت کالونی میں سڑک، پائپ لائن اور درختوں سے متعلق مسائل کا معائنہ کیا۔ انہوں نے وہاں آر ڈبلیو اے کے ساتھ مل کر زمینی سطح کے مسائل حل کرنے کا یقین دلایا۔ وزیر پرویش ورما نے کہا کہ تمام ایجنسیاں جیسے اے ڈی ایم سی، دہلی جل بورڈ اور پی ڈبلیو ڈی شہر میں پانی جمع ہونے کو روکنے کے لیے تیار کی گئی جامع حکمت عملی کے تحت ایک دوسرے کے ساتھ تال میل میں کام کر رہی ہیں۔
ہندوستھان سماچار
ہندوستان سماچار / محمد شہزاد
