نئی دہلی، 06 اپریل (ہ س)۔

بھارتیہ جنتا پارٹی کے 46ویں یوم تاسیس پر اتوار کو دہلی میں پارٹی ہیڈکوارٹر میں ایک پروگرام کا انعقاد کیا گیا۔ اس دوران پارٹی صدر جگت پرکاش نڈا نے پارٹی کے آنجہانی لیڈر دین دیال اپادھیائے اور شیاما پرساد مکھرجی کے مجسموں پر پھول چڑھائے۔ اس دوران دہلی کی وزیر اعلیٰ ریکھا گپتا اور پارٹی کے سینئر رہنما وہاں موجود تھے۔

اس دوران پارٹی کارکنوں سے اپنے خطاب میں بی جے پی صدر نے کہا کہ بھارتیہ جنتا پارٹی واحد پارٹی ہے جس نے اپنی نظریاتی بنیاد کو مضبوط رکھا ہے۔ ہم ووٹوں کی خاطر ایک جگہ سے دوسری جگہ نہیں گئے اور ہم نے اقتدار کے حصول کے لیے اپنے نظریے پر سمجھوتہ نہیں کیا۔ اسی طاقت سے آج بی جے پی آگے بڑھ رہی ہے۔انہوں نے کہا کہ پارٹی لیڈر شیاما پرساد مکھرجی نے نہرو کی کابینہ سے استعفیٰ دیا کیونکہ ان کا ماننا تھا کہ ایک ملک دو آئینوں سے نہیں چل سکتا۔ پنڈت دین دیال اپادھیائے نے انٹیگرل ہیومنزم پر ایک لیکچر دیا۔ بی جے پی نے انٹیگرل ہیومنزم کو فروغ دیا اور مودی جی کی قیادت میں انتیودیا کو ’سب کا ساتھ، سب کا وکاس، سب کا پرایاس، سب کا وشواس‘ کی شکل میں فروغ دیا گیا۔

اس دوران نڈا نے کہا کہ مرکزی حکومت وقف بورڈ کو کنٹرول نہیں کرنا چاہتی۔ ہمارا مقصد صرف اس بات کو یقینی بنانا ہے کہ وقف کے انتظام کو قانون کے اندر قائم کردہ قواعد کے مطابق انجام دیا جائے۔ وقف بورڈ کی جائیدادیں اور فنڈز مسلم کمیونٹی کے لیے تعلیم، صحت کی دیکھ بھال اور روزگار کے مواقع کو فروغ دینے کے لیے وقف کیے جائیں گے۔

ہندوستھان سماچار

ہندوستان سماچار / Mohammad Khan