نئی دہلی، 3 اپریل (ہ س)۔ وزیر اعظم نریندر مودی نے جمعرات کو بنکاک میں کہا کہ ہندوستان کی ایکٹ ایسٹ پالیسی اور انڈو پیسفک ویژن میں تھائی لینڈ کا ایک خاص مقام ہے۔ آج ہم نے اپنے تعلقات کو اسٹریٹجک شراکت داری کی سطح پر لانے کا فیصلہ کیا ہے۔

تھائی لینڈ کے وزیر اعظم پتونگتارن شیناواترا کے ساتھ ایک پریس میٹنگ سے خطاب کرتے ہوئے وزیر اعظم مودی نے کہا کہ سیکورٹی ایجنسیوں کے درمیان 'اسٹریٹجک ڈائیلاگ' قائم کرنے پر بھی بات چیت کی گئی۔ ہم نے تھائی لینڈ کی حکومت سے سائبر کرائم کے شکار ہندوستانی متاثرین کو ہندوستان واپس بھیجنے میں ان کی طرف سے تعاون کے لیے شکریہ ادا کیا۔ ہم نے ہندوستان اور تھائی لینڈ کی شمال مشرقی ریاستوں کے درمیان سیاحت، ثقافت، تعلیم کے شعبوں میں تعاون پر زور دیا ہے۔ باہمی تجارت، سرمایہ کاری اور کاروباری تبادلے بڑھانے پر بات چیت ہوئی۔ ایم ایس ایم ای، ہینڈلوم اور دستکاری میں تعاون کے لیے بھی معاہدوں پر دستخط کیے گئے ہیں۔

انہوں نے کہا کہ ہندوستان آسیان اتحاد اور آسیان کی مرکزیت کی مکمل حمایت کرتا ہے۔ ہند-بحرالکاہل میں، ہم دونوں آزاد، کھلے، جامع اور قواعد پر مبنی آرڈر کی حمایت کرتے ہیں۔ ہم توسیع پسندی پر نہیں ترقی کی پالیسی پر یقین رکھتے ہیں۔

تھائی لینڈ میں حالیہ زلزلے میں ہونے والی ہلاکتوں پر ہندوستانی عوام کی جانب سے تعزیت کا اظہار کرتے ہوئے وزیر اعظم مودی نے کہا، ہندوستان کے لوگوں کی طرف سے، میں 28 مارچ کے زلزلے میں جانی نقصان پر اپنی گہری تعزیت کا اظہار کرتا ہوں اور زخمیوں کی جلد صحت یابی کی خواہش کرتا ہوں۔

وزیر اعظم نے کہا کہ ہندوستان اور تھائی لینڈ کے درمیان صدیوں پرانے تعلقات ہمارے گہرے ثقافتی اور روحانی دھاگوں سے جڑے ہوئے ہیں۔ بدھ مت کے پھیلاؤ نے ہمارے لوگوں کو جوڑ دیا ہے۔ ایوتھایا سے نالندہ تک علم کا تبادلہ ہوا ہے۔ رامائن کی کہانی تھائی لوک زندگی میں گہرائی سے جڑی ہوئی ہے، اور سنسکرت اور پالی کے اثرات آج بھی زبان اور روایات میں نظر آتے ہیں۔ انہوں نے کہا، پچھلے سال ہندوستان نے بدھ مت کے آثار تھائی لینڈ بھیجے، جس نے 40 لاکھ سے زیادہ عقیدت مندوں کی توجہ اپنی طرف مبذول کروائی۔ مجھے یہ اعلان کرتے ہوئے خوشی ہو رہی ہے کہ گجرات کے اراولی ضلع میں 1960 اور 1963 کے درمیان کھدائی کی گئی بدھ مت کے نوادرات کو بھی تھائی لینڈ بھیجا جائے گا۔

انہوں نے کہا کہ ہندوستان میں ہونے والے مہا کمبھ میں بھی ہماری پرانی رفاقت نظر آئی۔ اس روحانی اور ثقافتی اجتماع میں تھائی لینڈ سمیت کئی ممالک سے 600 سے زائد بدھ مت کے عقیدت مندوں نے شرکت کرکے عالمی امن اور ہم آہنگی کا پیغام دیا۔

ایک خصوصی ڈاک ٹکٹ جاری کرنے کے لیے تھائی لینڈ کی حکومت کا شکریہ ادا کرتے ہوئے وزیر اعظم نے کہا، میں تھائی لینڈ کی حکومت کا شکر گزار ہوں کہ انہوں نے ان کے دورے کی یاد میں 18ویں صدی کے 'رامائن' کی دیواری پینٹنگز پر مبنی ایک خصوصی ڈاک ٹکٹ جاری کیا۔

---------------

ہندوستان سماچار / عبدالسلام صدیقی