بھوپال، 31 مارچ (ہ س)۔ ملک بھر میں آج (پیر) کو عیدالفطر کا تہوار جوش و خروش کے ساتھ منایا جا رہا ہے۔ عید کی نماز مختلف مساجد میں ادا کی جا رہی ہے۔ مدھیہ پردیش میں بھی عید کا تہوار بڑے اہتمام سے منایا جا رہا ہے۔ صبح سے ہی لوگ نمازعید ادا کرنے کے لیے عیدگاہ اور مساجد پہنچ گئے۔ بھوپال میں عیدگاہ میں سب سے پہلے 7:30 بجے عید کی نماز ادا کی گئی۔ ہر سال کی طرح اس بار بھی توپوں کے گولے برسا کر نماز کا اعلان کیا گیا۔

قبل ازیں شہر قاضی سید مشتاق علی ندوی نے صبح 7:15 بجے عیدگاہ میں نماز عید ادا کی۔ اس دوران عید ملن کا پروگرام بھی منعقد کیا گیا۔ مسلم کمیونٹی کے لوگوں کی بڑی تعداد صبح یہاں پہنچی اور نماز ادا کرنے کے بعد ایک دوسرے سے گلے مل کر ایک دوسرے کو عید کی مبارکباد دی۔ بھوپال کی اہم مساجد - تاج المسجد، جامع مسجد اور موتی مسجد کے ساتھ ساتھ دیگر مساجد میں عید کی نماز ادا کی جارہی ہے۔ بھوپال میں عیدگاہ اور دیگر بڑی مساجد کے ارد گرد سخت حفاظتی انتظامات کیے گئے ہیں۔ پولیس فورس کی تعیناتی کے ساتھ ساتھ ٹریفک کو منظم رکھنے کے لیے خصوصی روٹ پلان بھی تیار کیا گیا ہے۔ نمازیوں کی سہولت کے لیے اس بار بھی گرودوارہ انتظامیہ نے اپنے احاطے میں گاڑیوں کی پارکنگ کا انتظام کیا ہے۔

نماز سے قبل شہر قاضی مشتاق علی ندوی نے اپنے خطاب میں نوجوانوں سے کہا کہ کردار اور اخلاق کا مظاہرہ کرو۔ نشے سے دور رہیں، حلال کمائی پر توجہ دیں۔ حلال اور حرام میں فرق کرنا سیکھیں۔ شہر قاضی نے کہا کہ اپنے روزمرہ کے اخراجات کم کریں لیکن اپنے بچوں کی اچھی تعلیم پر خصوصی توجہ دیں۔

---------------

ہندوستان سماچار / عبدالسلام صدیقی