حیدرآباد , 26 مارچ (ہ س) تلنگانہ ریاستی حکومت نے بے روزگار نوجوانوں کے لیے خوشخبری دی ہے۔ چین کی مشہورالکٹرک وہیکل مینوفیکچرنگ کمپنی بی وائی ڈی حیدرآباد کے مضافاتی علاقہ میں الکٹرک کار مینوفیکچرنگ یونٹ قائم کرنے کی تیاری کر رہی ہے۔ اس پروجکٹ کے ذریعہ ہزاروں روزگار کے مواقع پیدا ہونے کی توقع ہے۔فی الحال بی وائی ڈی چین میں تیار کردہ الکٹرک کاروں کو ہندوستان میں درآمدکرکے فروخت کر رہی ہے۔ تاہم درآمدی ٹیکس کے بوجھ کو کم کرنے کے لیے، کمپنی نے ہندوستان میں ہی مینوفیکچرنگ یونٹ قائم کرنے کا فیصلہ کیا ہے۔ تلنگانہ حکومت نے اس پراجکٹ کیلئے اراضی کے الاٹمنٹ اور ضروری منظوری کیلئے مثبت ردعمل ظاہر کیا ہے۔ حیدرآباد کے مضافات میں تین مقامات بی وائی ڈی کے نمائندوں کو تجویز کیے گئے ہیں۔ جیسے ہی کمپنی کسی ایک مقام کو منتخب کرے گی، معاہدہ طے پانے کی توقع ہے۔ اگر سب کچھ منصوبے کے مطابق ہوا، توتلنگانہ ہندوستان میں بی وائی ڈی کا پہلا مینوفیکچرنگ یونٹ قائم کرنے والی ریاست بن جائے گی۔
ہندوستھان سماچار
ہندوستان سماچار / محمدعبدالخالق
