بی جے پی نے مسلم ووٹروں کو متوجہ کرنے کے لیے سوغاتِ مودی مہم شروع کیپٹنہ، 25 مارچ (ہ س)۔ بہار میں آئندہ اسمبلی انتخابات کے پیشِ نظر بی جے پی نے مسلم ووٹروں کو متوجہ کرنے کے لیے ’سوغاتِ مودی’ مہم شروع کی ہے۔ رپورٹ کے مطابق اس مہم کے تحت بی جے پی کے 32 ہزار عہدیدار ریاست بھر کی 32 ہزار مساجد میں رابطہ کر رہے ہیں اور 32 لاکھ ضرورت مند مسلمانوں میں راشن کٹس، کپڑے اور دیگر ضروری اشیاء تقسیم کر رہے ہیں تاکہ عید کے موقع پر انہیں کسی قسم کی دشواری نہ ہو۔بی جے پی کا دعویٰ ہے کہ اس مہم کے ذریعے وہ مسلمانوں میں اپنی فلاحی اسکیموں کے بارے میں آگاہی پیدا کرے گی۔ پارٹی کے مطابق، وزیر اعظم نریندر مودی کی قیادت میں چلائی جانے والی اسکیمیں جیسے مفت راشن، مفت ویکسینیشن، بیت الخلاء تعمیر منصوبہ اور دیگر سہولیات سے اقلیتی طبقے کو فائدہ پہنچا ہے، جسے اجاگر کرنے کے لیے یہ مہم چلائی جا رہی ہے۔بی جے پی کے اقلیتی مورچہ کے قومی صدر جمال صدیقی نے کہا کہ مہم کا مقصد صرف عید پر تحفے دینا نہیں بلکہ اقلیتی طبقے کو حکومت کی فلاحی اسکیموں سے واقف کرانا ہے۔ انہوں نے کہا کہ پارٹی کا فوکس مسلم ووٹروں کو لبھانا ہے تاکہ اسمبلی انتخابات میں بی جے پی کو ان کا اعتماد حاصل ہو سکے۔ سیاسی تجزیہ کاروں کا ماننا ہے کہ بہار میں مسلم ووٹروں کی بڑی تعداد آر جے ڈی، کانگریس اور دیگر سیکولر جماعتوں کے ساتھ رہی ہے، تاہم بی جے پی اس مہم کے ذریعے مسلم ووٹ بینک میں نقب لگانے کی کوشش کر رہی ہے۔بی جے پی کی اس مہم پر حزب اختلاف نے تنقید کی ہے۔ کانگریس نے الزام عائد کیا ہے کہ یہ محض انتخابی حربہ ہے اور عید کے موقع پر تحائف دے کر ووٹ بٹورنے کی کوشش کی جا رہی ہے۔ حزب اختلاف کا کہنا ہے کہ بی جے پی کی پالیسیاں مسلمانوں کے خلاف رہی ہیں، اس لیے یہ مہم محض ووٹ بینک سیاست کا حصہ ہے۔ بی جے پی کا کہنا ہے کہ ‘سوغاتِ مودی’ مہم کا مقصد مسلمانوں کو حکومت کی فلاحی اسکیموں کے فوائد سے جوڑنا ہے، تاکہ انتخابات میں ان کا اعتماد حاصل کیا جا سکے۔ہندوستھان سماچار

ہندوستان سماچار / Mohammad Afzal Hassan