سنگرولی بس اسٹینڈ پر کھڑی دو بسوں میں زبردست آگ لگی، کلینر زندہ جل کر جاں بحق
سنگرولی، 25 مارچ (ہ س)۔ مدھیہ پردیش کے سنگرولی ضلع ہیڈکوارٹر پر واقع بین ریاستی بس اسٹینڈ پر کھڑی دو بسوں میں پیر کی دیر رات اچانک آگ لگ گئی۔ اس حادثے میں بس میں سورہا کلینر زندہ جل کر ہلاک ہو گیا۔ اطلاع ملنے پر پولیس اور فائر بریگیڈ کی گاڑیاں موقع پر پہنچ گئیں اور کافی مشقت کے بعد آگ پر قابو پالیا تاہم تب تک دونوں بسیں جل کر راکھ ہو چکی تھیں۔ پولیس فی الحال معاملے کی جانچ کر رہی ہے۔
ٹریفک تھانہ انچارج دیپندر سنگھ نے بتایا کہ پیر-منگل کی درمیانی رات تقریباً 12 بجے سنگرولی انٹر اسٹیٹ بس اسٹینڈ پر کھڑی وجے ٹریول کی بس نمبر سی جی -33، ای -0813 میں اچانک آگ لگ گئی۔ آگ تیزی سے پھیلی اور قریب ہی کھڑی صدیقی بس سروس کی بس نمبر ایم پی -17، پی 1277 کو بھی زد میں لے لیا۔ اطلاع ملتے ہی فائر بریگیڈ کی ٹیم نے موقع پر پہنچ کر آگ پر قابو پالیا۔
انہوں نے بتایا کہ حادثے کے وقت وجے ٹریولز کی بس میں ڈرائیور زاہد خان، کنڈکٹر کاشی پٹیل اور کلینر ہریش پنیکا سو رہے تھے۔ بس کے آگے کنڈکٹر کاشی سو رہا تھا، ڈرائیور زاہد پیچھے سو رہا تھا اور کلینر ہریش بس کی درمیانی سیٹ پر سو رہا تھا۔ رات تقریباً 12 بجے کاشی کی آنکھ کھلی تو اس نے بس کو آگ لگی ہوئی دیکھی۔ وہ گھبرا کر اٹھا اور باہر آنے کو پکارا۔ کاشی سامنے کے گیٹ سے باہر نکلا جبکہ زاہد پچھلے گیٹ سے باہر آیا لیکن ہریش باہر نہیں آ سکا۔ آگ اتنی تیزی سے پھیلی کہ اسے بھاگنے کا وقت ہی نہ ملا۔ وہ زندہ جل گیا۔ ہریش پنیکا (24) چھتیس گڑھ کے بلرام پور کے واڈرف نگر کا رہنے والا تھا۔ اس کی شادی 2023 میں ہوئی ہے۔ اس کی کوئی اولاد نہیں ہے۔
ہندوستھان سماچار
---------------
ہندوستان سماچار / انظر حسن
