کانگریس کا مقصد قیادت کی سطح پر دلتوں، قبائلیوں اور پسماندہ لوگوں کو دیکھنا

پٹنہ، 5 فروری (ہ س)۔ لوک سبھا میں اپوزیشن لیڈر اور کانگریس کے سینئرلیڈر راہل گاندھی بہار میں ہونے والی ذات پر مبنی مردم شماری پر بھی سوالات اٹھائے ۔ انہوں نے کہا کہ بہار کی ذات پر مبنی مردم شماری کو نہ دیکھیں، لیکن اگر کوئی ذات کی شرکت کی حقیقت جاننا چاہتا ہے تو تلنگانہ میں ہونے والی ذات پر مبنی گنتی کو دیکھے۔ انہوں نے تلنگانہ ماڈل کو قومی سطح پر اپنانے کی وکالت کی۔ انہوں نے کہا کہ قومی سطح پر ذات پر مبنی گنتی کرانے کی ضرورت ہے، وہ بدھ کے روز پٹنہ میں منعقدہ مجاہدآزادی جگلال چودھری کی 130ویں یوم پیدائش کی تقریبات سے خطاب کر رہے تھے۔

راہل گاندھی نے مرکزی حکومت کو نشانہ بناتے ہوئے سوال کیا کہ ہندوستان کے اقتداری ڈھانچے جیسے تعلیم، صحت، کارپوریٹ یا عدلیہ میں دلتوں کی شرکت کیا ہے؟ بی جے پی نمائندگی کی بات کرتی ہے، لیکن شرکت کے بغیر نمائندگی کا کوئی مطلب نہیں ہے۔ یہ بالکل ایسے ہی ہے جیسے میں نے آپ میں سے پانچ لوگوں کوا سٹیج پر بٹھایا، لیکن ان کے فیصلے کہیں اور سے ہو رہے ہیں۔ مودی حکومت میں بھی یہی ہو رہا ہے کہ آپ لوگوں کو وزیر بناتے ہیں، لیکن او ایس ڈی اسی نظریے سے آتے ہیں۔ انہوں نے کہا کہ ہم امبیڈکر اور جگلال چودھری کے خیالات اور اصولوں کی بات کرتے ہیں۔ لیکن سوال یہ ہے کہ امبیڈکر اور جگلال چودھری کے خیالات کہاں سے آئے؟ سچ تو یہ ہے کہ امبیڈکر اور جگلال چودھری نے دلتوں کے دلوں میں دکھ اور درد کے خلاف آواز اٹھائی۔

راہل گاندھی نے کہا کہ ملک کی 200 بڑی کمپنیوں میں ایک بھی دلت، او بی سی یا قبائلی نہیں ہے۔ ہندوستان کے بجٹ کا فیصلہ 90 لوگ کرتے ہیں۔ ان لوگوں میں صرف تین دلت ہیں۔ تینوں افسران کو چھوٹے محکمے دیے گئے ہیں۔ اگر حکومت 100 روپے خرچ کرتی ہے تو صرف ایک روپے کا فیصلہ دلت افسران لیتے ہیں۔ اسی طرح پچاس فیصد آبادی پسماندہ طبقے سے تعلق رکھتی ہے۔ اس زمرے کے صرف تین افسران ہیں۔ دلتوں، قبائلیوں اور پسماندہ طبقات کی شرکت 100 روپے میں صرف چھ فیصد ہے۔ انہوں نے کہا کہ آبادی کے لحاظ سے تمام شعبوں میں نمائندگی کو یقینی بنانے کے لیے ذات پر مبنی مردم شماری کرانا سب سے ضروری ہے۔ انہوں نے کہا کہ ہمارا مقصد دلتوں، قبائلیوں اور پسماندہ لوگوں کو قیادت کی سطح پر دیکھنا ہے۔

قابل ذکر ہے کہ راہل گاندھی کے اس بیان سے بہار میں کانگریس کی ساتھی آر جے ڈی کے لیے تناؤ بڑھنے والاہے۔ لالو یادو اور تیجسوی یادو اکثر بہار میں ہونے والی ذات پر مبنی گنتی کو اپنی سب سے بڑی کامیابی قرار دیتے ہیں۔ لیکن اب راہل گاندھی نے اس پر انگلی اٹھاتے ہوئے آر جے ڈی کے دعوؤں کو کٹہرے میں کھڑا کر دیا ہے۔

ہندوستھان سماچار

ہندوستان سماچار / Mohammad Afzal Hassan