نئی دہلی، 25 دسمبر (ہ س)۔ بیرونی شمالی ضلع کے سمے پور بادلی تھانے کی پولیس نے 13 سالہ لڑکی کی عصمت دری کے معاملے میں دو ملزمان کو گرفتار کیا ہے۔ گرفتار ملزمان کی شناخت رشبھ اور نروتم عرف نیتا کے طور پر کی گئی ہے۔
پولیس حکام کے مطابق 20 دسمبر کی شام پی سی آر کو اطلاع ملی کہ ایک نابالغ لڑکی کو زبردستی شراب پلائی گئی ہے۔ اطلاع ملتے ہی پولیس کی ایک ٹیم فوراً راجہ وہار علاقے میں پہنچی۔ ابتدائی طور پر متاثرہ کے والد نے صرف شراب پلانے کی شکایت درج کروائی لیکن تحقیقات آگے بڑھنے پر معاملے کی سنگینی واضح ہوئی۔
تفتیش کے دوران متاثرہ کا طبی معائنہ کرایا گیا، جہاں اس نے اپنے بیان میں کہا کہ ملزم نروتم، جو کہ راجہ وہار میں حجام کی دکان چلاتا ہے، اسے بہلا کر ایک خالی مکان میں لے گیا، جہاں اس کا تعارف اپنے دوست رشبھ سے کروایا۔
الزام ہے کہ دونوں ملزمین نے نابالغ کو نروتم کے خالی خاندانی گھر لے جا کر اسے زبردستی شراب پلائی، اور اس کی عصمت دری کی۔ متاثرہ کے تفصیلی بیان اور میڈیکل رپورٹ کی بنیاد پر سمے پور بادلی پولیس اسٹیشن میں 21 دسمبر کو کیس درج کر لیا گیا ، جس کے بعد پولیس نے فوری کارروائی کرتے ہوئے دونوں ملزمان کو گرفتار کرلیا۔
بیرونی شمالی ضلع کے ڈپٹی کمشنر آف پولیس ہریشور سوامی نے جمعرات کو کہا کہ معاملے کی سنگینی کو دیکھتے ہوئے، بیرونی شمالی ضلع پولیس نے ایک خصوصی تفتیشی ٹیم (ایس آئی ٹی ) تشکیل دی ہے۔ ڈپٹی کمشنر آف پولیس کی ہدایت پر یہ ٹیم کیس کی مکمل، بروقت اور غیر جانبدارانہ تحقیقات کرے گی اور جلد ہی عدالت میں چارج شیٹ داخل کی جائے گی۔ فی الحال مزید تفتیش جاری ہے۔
ہندوستھان سماچار
ہندوستان سماچار / محمد شہزاد
