نئی دہلی،20دسمبر(ہ س)۔پریس کلب آف انڈیا نے بنگلہ دیش میں صحافیوں کے خلاف بڑھتے ہوئے تشدد، میڈیا اداروں پر حملوں اور صحافیوں کی گرفتاریوں پر گہری تشویش کا اظہار کرتے ہوئے ان واقعات کی سخت الفاظ میں مذمت کی ہے۔پریس کلب آف انڈیا کی جانب سے جاری ایک بیان میں کہا گیا ہے کہ بنگلہ دیش کے معروف اخبارات پرتھوم آلو اور دی ڈیلی اسٹار کے دفاتر پر پ±رتشدد حملے، توڑ پھوڑ اور آتش زنی کے واقعات نہایت افسوسناک اور قابلِ مذمت ہیں۔ بیان میں ایڈیٹرز کونسل کے صدر اور روزنامہ نیو ایج کے ایڈیٹر، سینئر صحافی نورل کبیر کو ہراساں کیے جانے کے واقعات پر بھی شدید تشویش ظاہر کی گئی ہے۔

پریس کلب آف انڈیا کے مطابق، بنگلہ دیش میں عبوری حکومت کے اقتدار میں آنے کے بعد اب تک 100 سے زائد صحافیوں کو قتل کے الزامات کے تحت گرفتار کیا جا چکا ہے، جنہیں بغیر کسی عدالتی کارروائی کے طویل عرصے سے جیلوں میں رکھا گیا ہے۔ پی سی آئی نے ان تمام صحافیوں کی فوری اور غیر مشروط رہائی کا مطالبہ کیا ہے۔بیان میں کہا گیا ہے کہ آزاد، خودمختار اور ذمہ دار صحافت کسی بھی جمہوری معاشرے کی بنیادی اساس ہوتی ہے اور میڈیا کو خاموش کرانے کی کسی بھی کوشش کو قبول نہیں کیا جا سکتا۔ پریس کلب آف انڈیا نے واضح کیا کہ صحافیوں کے خلاف تشدد، دھمکیاں، حملے یا ہراسانی نہ صرف میڈیا کی آزادی کے منافی ہیں بلکہ آئینی طور پر حاصل اظہارِ رائے کی آزادی اور قانون کی بالادستی کی بھی سنگین خلاف ورزی ہیں۔پریس کلب آف انڈیا کی صدر سنگیتا بارواہ پشاروتی اور سکریٹری جنرل افضل امام نے مطالبہ کیا کہ ان واقعات میں ملوث عناصر کی فوری نشاندہی کی جائے اور ایک منصفانہ، غیر جانبدار اور تیز رفتار تحقیقات کے ذریعے مجرموں کو قانون کے کٹہرے میں لایا جائے۔پریس کلب آف انڈیا نے بین الاقوامی صحافتی تنظیموں اور انسانی حقوق کے اداروں سے بھی اپیل کی ہے کہ وہ بنگلہ دیش میں صحافیوں کی سلامتی اور میڈیا کی آزادی کے تحفظ کے لیے مو¿ثر کردار ادا کریں۔

ہندوستھان سماچار

ہندوستان سماچار / Md Owais Owais