نئی دہلی، 17 دسمبر (ہ س): دہلی پولیس میں کانسٹیبل سے لے کر ڈی سی پی تک مختلف رینک پر کل 9,248 آسامیاں خالی ہیں، وزارت داخلہ نے بدھ کو راجیہ سبھا میں ایک سوال کے تحریری جواب میں کہا۔

وزیر مملکت برائے داخلہ نتیانند رائے نے کہا کہ 30 نومبر 2025 تک دہلی پولیس کی کل منظور شدہ تعداد 92,044 ہے، جس کے خلاف ہزاروں عہدے ابھی بھی خالی ہیں۔

اعداد و شمار کے مطابق سب سے زیادہ آسامیاں کانسٹیبل کی سطح پر ہیں جہاں 50,946 منظور شدہ عہدوں میں سے 4,591 خالی ہیں۔ اس کے بعد ہیڈ کانسٹیبل کے 3,057 اور سب انسپکٹر کے 1,039 عہدے ہیں۔ اسسٹنٹ سب انسپکٹر کی 300 اور انسپکٹر کی 108 آسامیاں بھی خالی ہیں۔ افسر کی سطح پر، 125 اے سی پی کے عہدے اور 13 ڈی سی پی/ایڈیشنل ڈی سی پی کے عہدے خالی ہیں۔

وزیر موصوف نے واضح کیا کہ پولیس فورس میں آسامیاں ایک متحرک عمل ہے، جو وقتاً فوقتاً ریٹائرمنٹ، ترقیوں اور استعفوں جیسے عوامل کی وجہ سے تبدیل ہوتی رہتی ہے۔ انہوں نے کہا کہ ان اسامیوں کو پر کرنے کا عمل جاری ہے، اور اسامیوں کے بارے میں معلومات باقاعدگی سے ریکروٹمنٹ ایجنسیوں کو دی جاتی ہیں۔

وزارت داخلہ کے مطابق، تقرریاں تحریری امتحانات، جسمانی کارکردگی کے ٹیسٹ اور طبی معائنے جیسے طریقہ کار کی تکمیل کے بعد ہی کی جاتی ہیں۔ حکومت نے یقین دلایا کہ قائم کردہ طریقہ کار پر عمل کرتے ہوئے تمام خالی اسامیوں کو تیزی سے پر کرنے کی کوشش کی جا رہی ہے۔

---------------

ہندوستان سماچار / عبدالسلام صدیقی