نئی دہلی، 5 نومبر (ہ س)۔ تجارت اور صنعت کے مرکزی وزیر مملکت جتن پرساد نے بدھ کو براسوو میں منعقدہ ہندوستان-رومانیہ بزنس فورم میں ایک ہندوستانی تجارتی وفد کی قیادت کی۔ انہوں نے دونوں ممالک کے درمیان تجارت اور سرمایہ کاری کو فروغ دینے کے عزم کا اعادہ کیا اور مفاہمت کی یادداشت پر دستخط کئے۔

تجارت اور صنعت کی وزارت کے مطابق، جیتن پرساد نے اپنے خطاب میں سب سے تیزی سے ترقی کرنے والی بڑی معیشتوں میں سے ایک کے طور پر ہندوستان کی حیثیت کو اجاگر کیا اور رومانیہ کے کاروباری اداروں کو 'میک ان انڈیا' اور پروڈکشن لنکڈ انسینٹیو اسکیموں کے تحت ہندوستان کے متحرک مینوفیکچرنگ اور اختراعی ماحولیاتی نظام میں حصہ لینے کی دعوت دی۔

وزارت نے کہا کہ 'ہندوستان میں کاروباری مواقع' پر پریزنٹیشن میں حالیہ پالیسی اصلاحات، تجارتی سہولت کاری کے اقدامات اور کلیدی صنعتی راہداریوں میں ریاستی سطح پر مراعات کا خاکہ پیش کیا گیا ہے۔ اجلاس کے دوران مفاہمت کی یادداشتوں (ایم او یوز) پر دستخط کیے گئے۔ ہندوستانی اور رومانیہ کی کمپنیوں کے درمیان مشترکہ منصوبوں اور ٹکنالوجی کے تعاون کو تلاش کرنے کے لیے کاروباری بات چیت کا بھی انعقاد کیا گیا۔

تجارت اور صنعت کی وزارت کے مطابق، اس تقریب کا انعقاد چیمبر آف کامرس اینڈ انڈسٹری آف براسوو (سی سی آئی بی وی) نے بخارسٹ میں ہندوستانی سفارت خانہ اور صنعت اور اندرونی تجارت کے فروغ کے محکمے کے اشتراک سے کیا تھا۔ کانفرنس کا بنیادی مقصد دونوں ممالک کے درمیان دوطرفہ سرمایہ کاری اور صنعتی تعاون کو وسعت دینا تھا، جس میں ترجیحی شعبوں جیسے کہ آٹوموٹیو، ایرو اسپیس، دفاع، قابل تجدید توانائی، انجینئرنگ خدمات، اور انفارمیشن اینڈ کمیونیکیشن ٹیکنالوجی کے پیشہ ور افراد کو اکٹھا کرنا تھا۔

ہندوستھان سماچار

---------------

ہندوستان سماچار / عبدالواحد