حیدرآباد ، 3 نومبر (ہ س)۔

تلنگانہ کے ضلع رنگاریڈی میں پیش آئے خوفناک سڑک حادثہ میں 20افرادہلاک اوردیگرکئی زخمی ہوگئے۔ یہ حادثہ اُس وقت پیش آیاجب تانڈورڈپو سے تعلق رکھنے والی بس کوچیوڑلہ منڈل کے مرزاپورکے قریب کنکرسے لدی ٹپرلاری نے ٹکراگئی۔ ٹکر کے بعد کنکرکا بھاری لوڈ بس پرگرنے سے کئی مسافر اس میں دب گئے۔ اطلاع کے مطابق اس حادثہ میں کم ازکم 15تا 20 افراد ہلاک اورکئی دیگر شدید زخمی ہوگئے۔ پولیس فوراً جائے حادثہ پر پہنچ گئی اورجے سی بی کی مدد سے امدادی کارروائیاں شروع کردیں۔ دبے ہوئے افراد کونکالنے کا کام جاری ہے۔ مہلوکین میں دس مرد اور9 خواتین ہیں جبکہ ایک کم عمرودیگربھی شامل ہے۔حادثہ کے ساتھ ہی زخمیوں نے چیخ وپکارشروع کردی۔ پولیس نے موقع پرپہنچ کرتین جے سی بی مشینوں کے ذریعہ راحت کاموں کاآغازکیا۔ پولیس نے 15افراد بشمول کنڈکٹررادھا کو بچایا۔پولیس کی امدادی کارروائیوں کے دوران چیوڑلہ کے سرکل انسپکٹرسریدھرکے پاوں پرجے سی بی چڑھ گیا جس کی وجہ سے وہ بھی زخمی ہوگئے۔ان کوعلاج کے لئے چیوڑلہ کے سرکاری ہاسپٹل منتقل کیاگیا۔ زخمیوں میں تین کی حالت تشویشناک بتائی جاتی ہے۔ اطلاعات کے مطابق آرٹی سی بس تانڈورسے حیدرآباد جارہی تھی اوراس میں تقریباً 70مسافرسوارتھے، جن میں زیادہ ترطلبہ اورملازمین شامل تھے۔ بتایاجاتا ہے کہ طلبہ اتوارکی چھٹی کے بعدپیر کو اپنے گھروں سے واپس حیدرآبادکے مختلف کالجوں کی طرف جارہے تھے۔ اس حادثہ کے بعدحیدرآباد۔ بیجاپور ہائی وے پرشدید ٹریفک جام ہوگیااور چیوڑلہ۔ وقارآباد روٹ پرگاڑیوں کی لمبی قطاریں لگ گئیں۔ حادثہ کامقام دلخراش منظرپیش کررہاتھا۔مذید تحقیقات جاری ہیں۔

ہندوستھان سماچار

ہندوستان سماچار / محمدعبدالخالق