گجرات میں سیمی کنڈکٹر اور ڈسپلے فیب پروجیکٹس کی پیشرفت کا جائزہ لینے کے لیے گاندھی نگر میں ایک اعلیٰ سطحی میٹنگ منعقد

گاندھی نگر، 3 نومبر (ہ س)۔

انفارمیشن ٹکنالوجی، ریلویز، اور اطلاعات و نشریات کے مرکزی وزیر اشونی ویشنو نے کہا کہ وزیر اعظم نریندر مودی کی قیادت میں الیکٹرانکس اور سیمی کنڈکٹر سیکٹر پر خصوصی توجہ کے ساتھ ایک مہم شروع کی گئی ہے۔ انہوں نے کہا کہ الیکٹرانکس اور سیمی کنڈکٹر کی پیداوار ملک کی ترقی کے لیے بہت ضروری ہے۔ وزیر اعظم مودی کی رہنمائی میں یہ شعبے تیزی سے اور مو¿ثر طریقے سے ترقی کر رہے ہیں۔

مرکزی انفارمیشن ٹکنالوجی کے وزیر ویشنو پیر کو گجرات کے گاندھی نگر میں گجرات میں سیمی کنڈکٹر اور ڈسپلے فیب پروجیکٹوں کی پیشرفت کا جائزہ لینے کے لیے ایک اعلیٰ سطحی جائزہ اجلاس سے خطاب کر رہے تھے۔ ریاستی محکمہ اطلاعات کے ایک بیان کے مطابق، وزیر اعلی بھوپیندر پٹیل، نائب وزیر اعلی ہرش سنگھوی، اور سائنس اور ٹیکنالوجی کے وزیر ارجن موڈھواڈیا میٹنگ میں موجود تھے۔

مرکزی وزیر ویشنو نے دھولیرا اور سانند میں ٹاٹا، مائیکرون، اور سی جی سیمیکان کی طرف سے بنائے جانے والے سیمی کنڈکٹر پروجیکٹوں کے لیے درکار بجلی، پانی، لاجسٹکس، سماجی بنیادی ڈھانچہ، ریل، سڑک اور فضائی رابطہ فراہم کرنے سے متعلق ریاستی حکومت کے کام کے بارے میں ایک پریزنٹیشن کے ذریعے تفصیلی معلومات حاصل کیں۔

ویشنو نے اس اعتماد کا اظہار کیا کہ دھولیرا مستقبل میں ہائی ٹیک مینوفیکچرنگ کا ایک بڑا مرکز بنے گا۔ انہوں نے کہا کہ دنیا کا تقریباً ہر ملک ہندوستان اور گجرات میں سیمی کنڈکٹر سیکٹر پر نظریں جمائے ہوئے ہے اور سیمی کنڈکٹر انڈسٹری کے تناظر میں دھولیرا خصوصی ذکر کا مستحق ہے۔ ایسے میں مرکزی اور ریاستی حکومتوں پر بڑی ذمہ داری عائد ہوتی ہے کہ وہ ہندوستان میں پہلی سیمی کنڈکٹر چپ کو مقررہ وقت کے اندر مکمل طور پر فعال بنائیں۔

اس میٹنگ میں انہوں نے تقریباً 10 اہم پروجیکٹوں کے بارے میں معلومات حاصل کیں اور ان سے متعلق معاملات پر باقاعدگی سے فالو اپ میٹنگ کرنے کی ہدایات دیں۔ انہوں نے کہا کہ مرکزی اور ریاستی حکومتوں کے متعلقہ محکمے سیمی کنڈکٹر صنعتوں کو ضروری مدد فراہم کرنے کے لیے 24x7 دستیاب ہیں۔

ہندوستھان سماچار

ہندوستان سماچار / عطاءاللہ