نئی دہلی، 17 نومبر (ہ س)۔

سینٹرل بورڈ آف ڈائریکٹ ٹیکس (سی بی ڈی ٹی) کے چیئرمین روی اگروال نے پیر کو کہا کہ انکم ٹیکس محکمہ جنوری تک آسان انکم ٹیکس ایکٹ 2025 کے تحت انکم ٹیکس ریٹرن (آئی ٹی آر) فارم اور قواعد کو مطلع کرے گا۔ یہ یکم اپریل 2026 سے شروع ہونے والے مالی سال 2026-27 سے لاگو ہوگا۔ انکم ٹیکس ایکٹ، 2025، 12 اگست کو پارلیمنٹ نے منظور کیا تھا۔

سی بی ڈی ٹی کے چیئرمین روی اگروال نے نئی دہلی کے بھارت منڈپم میں منعقدہ بین الاقوامی تجارتی میلے میں ٹیکس دہندگان کے لاو¿نج کا افتتاح کرنے کے بعد صحافیوں سے بات کرتے ہوئے یہ بات کہی۔ انہوں نے کہا، ہم فارمز اور قواعد تیار کرنے کے عمل میں ہیں اور جنوری تک ان پر عمل درآمد کرنے کی سمت کام کر رہے ہیں، ٹیکس دہندگان کو ہمارے نظام کے اندر اپنے عمل کو ڈھالنے کے لیے کافی وقت دے رہے ہیں۔

روی اگروال نے کہا کہ محکمہ کا مقصد نئے قانون کے تحت تعمیل کو آسان بنانے کے لیے انکم ٹیکس ریٹرن فارم کو آسان بنانا ہے۔ نیا قانون چھ دہائیوں پرانے انکم ٹیکس ایکٹ 1961 کی جگہ لے گا۔ انہوں نے کہا کہ اس کا مقصد ٹیکس دہندگان کے لیے انکم ٹیکس ریٹرن (آئی ٹی آر) فارم کو آسان بنانا ہے تاکہ تعمیل میں آسانی ہو۔ اس موقع پر روی اگروال نے سی بی ڈی ٹی کے ارکان سنجے بہادر، پنکج کمار مشرا اور محکمہ انکم ٹیکس کے سینئر افسران کے ساتھ آئی آئی ٹی ایف-2025 میں جی ایس ٹی اور کسٹمز پویلین کا دورہ کیا۔

ہندوستھان سماچار

ہندوستان سماچار / عطاءاللہ