پولیس نے این ایچ-37 پر ضروری اشیاء سے لدی 298 گاڑیوں کی نقل و حرکت کو یقینی بنایا۔

امپھال، 7 اکتوبر (ہ س) منی پور میں پولیس اور مرکزی سیکورٹی فورسز ممنوعہ (جنگجو) تنظیموں کے خلاف اپنی مہم جاری رکھے ہوئے ہیں۔ ایک مشترکہ آپریشن میں سیکورٹی فورسز نے دو عسکریت پسند تنظیموں کے دو سرگرم ارکان کو گرفتار کرنے میں کامیابی حاصل کی ہے۔ پولیس قومی شاہراہوں پر سرچ آپریشن بھی کر رہی ہے۔

منی پور پولیس ہیڈکوارٹر نے منگل کو بتایا کہ ریاست میں باغیوں کی سرگرمیوں کو روکنے کے لیے گاڑیوں کی تلاشی جاری ہے۔ اس سلسلے میں دو باغی تنظیموں کے دو سرگرم ارکان (کیڈر) کو گرفتار کیا گیا ہے۔ نیشنل ہائی وے 37 پر سیکورٹی فورسز اور پولیس کی جانب سے مشترکہ سرچ آپریشن بھی کیا گیا۔ اس آپریشن کے دوران ضروری سامان لے جانے والی گاڑیوں کو ان کی منزلوں کی طرف روانہ کیا گیا۔

پولیس ہیڈکوارٹر نے بتایا کہ اشیم رابیندرو میتی (38) عرف راک عرف ساتھیبا، جو آر پی ایف/پی ایل اے کا ایک فعال کیڈر ہے، کو پیر کو گرفتار کیا گیا۔ بشنو پور ضلع کے ناپت اوانگ لیکئی کے رہنے والے ملزم کو امپھال مغربی ضلع کے لیمفیل سپر مارکیٹ علاقے سے گرفتار کیا گیا ہے۔ اس کے قبضے سے ایک آدھار کارڈ، شناختی کارڈ اور دیگر دستاویزات کے ساتھ ایک موبائل فون بھی برآمد ہوا ہے۔

پیر کے روز، سیکورٹی فورسز نے ایک سرگرم پریپک (پی آر او) کیڈر، فیروئجام ولسن لوانگ عرف فیجاوبا (23) کو ان کی رہائش گاہ کونگپال کونگکھم لیکائی، پورمپیٹ پولیس اسٹیشن علاقہ، امپھال مشرقی ضلع سے بھی گرفتار کیا۔

دریں اثنا، سیکورٹی فورسز نے اضلاع کے سرحدی اور حساس علاقوں میں سرچ آپریشن اور علاقے پر تسلط جاری رکھا ہوا ہے۔ پولیس نے گزشتہ 24 گھنٹوں کے دوران قومی شاہراہ 37 پر ضروری اشیاء لے جانے والی 298 گاڑیوں کی نقل و حرکت میں سہولت فراہم کی ہے۔ تمام حساس مقامات پر سخت حفاظتی انتظامات کیے گئے ہیں اور گاڑیوں کی آزادانہ اور محفوظ نقل و حرکت کو یقینی بنانے کے لیے حساس مقامات پر حفاظتی قافلے فراہم کیے گئے ہیں۔

منی پور کے مختلف اضلاع میں، پہاڑی اور وادی دونوں علاقوں میں کل 115 چوکیاں قائم کی گئی ہیں۔ تاہم کسی کو حراست میں نہیں لیا گیا ہے۔

---------------

ہندوستان سماچار / عبدالسلام صدیقی