نیویارک، 7 اکتوبر (ہ س)۔ چین نے بلوچ لبریشن آرمی (بی ایل اے) اور اس کی ذیلی تنظیم مجید بریگیڈ پر پابندی لگانے کا مطالبہ کیا ہے۔ چین کی سرکاری خبر رساں ایجنسی ژنہوا کے مطابق اقوام متحدہ میں چین کے نمائندے گینگ شوانگ نے پیر کو اقوام متحدہ کی جنرل اسمبلی میں یہ مسئلہ اٹھایا۔ شوانگ جنرل اسمبلی کے 80ویں اجلاس میں بین الاقوامی دہشت گردی کے خاتمے کے اقدامات پر چین کا موقف پیش کر رہے تھے۔ شوانگ نے کہا کہ دہشت گردی کے عالمی پھیلاؤ اور دوبارہ سر اٹھانے نے بین الاقوامی انسداد دہشت گردی کی صورتحال کو سنگین اور پیچیدہ بنا دیا ہے۔ چین نے دہشت گردی کے خاتمے کے لیے تین تجاویز پیش کی ہیں۔ ایک تجویز میں بی ایل اے اور اس سے وابستہ مجید بریگیڈ پر پابندی کا مطالبہ کیا گیا ہے۔ دوسری تجویز میں بین الاقوامی قانون کی حکمرانی کو برقرار رکھنے اور انسداد دہشت گردی کے لیے قانونی ڈھانچہ کو بہتر بنانے پر توجہ دی گئی ہے۔ شوانگ نے کہا کہ انسداد دہشت گردی کے فریم ورک کو اقوام متحدہ کے چارٹر کے مقاصد اور اصولوں کے مطابق ہونا چاہیے۔ اپنی تیسری تجویز میں چین نے ایک منظم انداز اپنانے اور انسداد دہشت گردی کے لیے ایک جامع بین الاقوامی فریم ورک قائم کرنے کی تجویز پیش کی۔ انہوں نے کہا کہ مربوط اقدامات کے ذریعے دہشت گردی کا خاتمہ کیا جائے۔ غربت اور دہشت گردی کے درمیان شیطانی چکر کو توڑنے کے لیے ترقیاتی امور کو ترجیح دی جائے۔ قابل ذکر ہے کہ بی ایل اے پاکستان کے صوبہ بلوچستان کی آزادی کے لیے تحریک چلا رہی ہے۔

---------------

ہندوستان سماچار / عبدالسلام صدیقی