نئی دہلی، 3 اکتوبر (ہ س): مرکزی کامرس اور صنعت کے وزیر پیوش گوئل نے جمعہ کو سنگاپور سٹی میں ان کے دفتر میں سنگاپور کے وزیر اعظم لارنس وونگ سے ملاقات کی۔ میٹنگ کے دوران ہندوستان اور سنگاپور کے درمیان جامع اسٹریٹجک شراکت داری کو مزید مستحکم کرنے کے لیے سرمایہ کاری کو بڑھانے پر تبادلہ خیال کیا۔
وزیر تجارت گوئل نے میٹنگ پر اپنے اطمینان کا اظہار کرتے ہوئے ایک ایکس پوسٹ میں کہا کہ بات چیت نے اپنے دوطرفہ تعلقات کی مضبوط رفتار کو برقرار رکھنے اور مستقبل کی ترقی کے وسیع امکانات کو تلاش کرنے کے لیے دونوں ممالک کے عزم کی تصدیق کی۔ انہوں نے کہا کہ مجھے سنگاپور کے وزیر اعظم لارنس وونگ سے مل کر خوشی ہوئی۔
اپنے دورے کے دوران، تجارت اور صنعت کے وزیر گوئل نے سنگاپور ایئر لائنز انجینئرنگ کمپنی (ایس آئی اے ای سی) کے چیف ایگزیکٹیو آفیسر (سی ای او) چن یو سینگ سے بھی ملاقات کی، جہاں انہوں نے ہوا بازی کی دیکھ بھال، مرمت اور اوور ہال (ایم آر او) کے شعبے میں ہندوستان-سنگاپور تعاون کو بڑھانے پر تبادلہ خیال کیا۔ بات چیت میں جدت، مہارت کی ترقی اور سرمایہ کاری میں تعاون کی نئی راہیں تلاش کرنے پر توجہ مرکوز کی گئی، جس کا مقصد ہندوستان کے بڑھتے ہوئے ایرو اسپیس ماحولیاتی نظام کو فروغ دینا اور عالمی رابطہ کو مضبوط بنانا ہے۔
گوئل نے کیپیٹا لینڈ انوسٹمنٹ گروپ کے سی ای او لی چی کون اور سینئر ایگزیکٹو ڈائریکٹر منوہر کھیتانی کے ساتھ الگ الگ میٹنگیں کیں۔ بات چیت میں ہندوستان میں پائیدار شہری ترقی اور بنیادی ڈھانچے کی توسیع پر توجہ مرکوز کی گئی، خاص طور پر لاجسٹکس، گودام اور ڈیٹا سینٹرز، اور اسٹریٹجک تعاون کے ذریعے ہندوستان کی ترقی کی کہانی کو آگے بڑھانے کے نئے مواقع تلاش کیے گئے۔ انہوں نے رائل گولڈن ایگل گروپ کے چیئرمین ٹی وی لن سے بھی ملاقات کی اور اگلی نسل کے انسانی ساختہ ریشوں کی تیاری کے لیے تمل ناڈو کے تھوتھکوڈی میں ایگل گروپ کے آئندہ گرین فیلڈ پروجیکٹ کا خیرمقدم کیا۔ یہ ماحول دوست ٹیکنالوجی روزگار کے مواقع پیدا کرے گی، ہندوستان کی ٹیکسٹائل ویلیو چین کو مضبوط کرے گی، اور ہندوستان-سنگاپور اقتصادی تعلقات کو گہرا کرے گی۔
---------------
ہندوستان سماچار / عبدالسلام صدیقی
