لداخ , 24 اکتوبر (ہ س)۔ لیفٹیننٹ گورنر لداخ کویندر گپتا نے کہا ہے کہ خود روزگاری اور انٹرپرینیورشپ معیشت کی ترقی، روزگار کے مواقع اور اختراعات کے فروغ کے لیے بنیادی ستون ہیں۔ انہوں نے کہا کہ یہ شعبے نہ صرف دولت پیدا کرتے ہیں بلکہ معیارِ زندگی بلند کرتے ہوئے معاشرتی ترقی اور مسابقت کو بھی تقویت دیتے ہیں۔

لیفٹیننٹ گورنر ضلع انتظامیہ کرگل کی جانب سے حسینی پارک میں منعقدہ ’جن ہِت مہم‘ کے پہلے مرحلے کی اختتامی تقریب سے خطاب کر رہے تھے، جس میں عوام، خود امدادی گروپس، ہنرمندوں، نوجوانوں اور مرکزی معاونت یافتہ اسکیموں کے مستفیدین نے بڑی تعداد میں شرکت کی۔

کویندر گپتا نے ضلع انتظامیہ کی جانب سے فلاحی پروگراموں کے مؤثر نفاذ اور گزشتہ 100 دنوں میں حاصل ہونے والی نمایاں کامیابیوں کو سراہتے ہوئے کہا کہ مرکزی معاونت یافتہ اسکیمیں مساوی ترقی کے فروغ، پسماندہ طبقات کی بہتری اور کم ترقی یافتہ علاقوں کی خوشحالی میں کلیدی کردار ادا کر رہی ہیں۔ انہوں نے کہا کہ یہ پروگرام غربت کے خاتمے، بنیادی ڈھانچے کی تعمیر اور انسانی وسائل کے فروغ کے لیے اہم ذریعہ ہیں۔

لیفٹیننٹ گورنر نے انتظامیہ پر زور دیا کہ وہ نوجوانوں، خواتین اور ہنرمندوں کے درمیان بیداری مہمات کو مزید مضبوط کرے تاکہ زیادہ سے زیادہ لوگ سرکاری اسکیموں سے فائدہ اٹھا سکیں اور اپنی معاشی حالت بہتر بنا سکیں۔ انہوں نے کہا کہ ہر شخص کو سرکاری ملازمت دینا ممکن نہیں، اس لیے توجہ ہنر مندی کے فروغ اور خود روزگاری کے مواقع پر مرکوز ہونی چاہیے۔

کویندر گپتا نے کہا کہ حکومت ہند اور مرکزی خطہ لداخ کی انتظامیہ جامع اور ہمہ جہت ترقی کے لیے پرعزم ہے۔ انہوں نے بتایا کہ اب تک 70 نوجوان کاروباریوں کو پی ایم ای جی پی اور پی ایم ایف ایم ای اسکیموں کے تحت استفادہ پہنچایا گیا ہے، جبکہ 30 قرضہ جات حال ہی میں منظور کیے گئے ہیں، جو انتظامیہ کے عوامی فلاح اور اقتصادی استحکام کے جذبے کی عکاسی کرتے ہیں۔

لیفٹیننٹ گورنر نے ایسپریشن ٹو انسپریشن فرام بلاک ٹو ڈسٹرکٹ پروگرام کو ایک انقلابی اور دور رس اقدام قرار دیتے ہوئے کہا کہ یہ پہل نچلی سطح پر اختراع، خود انحصاری اور بااختیار بننے کے جذبے کو فروغ دے گی۔ اس موقع پر انہوں نے اس پروگرام کے لیے ای پورٹل کا افتتاح بھی کیا، جسے ڈیجیٹل گورننس اور عوامی سہولت کی جانب ایک اہم قدم قرار دیا گیا۔

انہوں نے زراعت، باغبانی، ماہی پروری اور صحت کے شعبوں میں حاصل ہونے والی پیش رفت پر اطمینان کا اظہار کرتے ہوئے ضلع انتظامیہ اور متعلقہ محکموں کو ان کی خدمات پر سراہا۔

رکن پارلیمان محمد حنیفہ جان نے انتظامیہ کی مربوط کوششوں کو سراہتے ہوئے کہا کہ ’جن ہِت مہم‘ نے عوام میں سرکاری فلاحی اسکیموں سے متعلق آگاہی پیدا کرنے اور ان کے فوائد تک رسائی ممکن بنانے میں نمایاں کردار ادا کیا ہے۔ انہوں نے یقین دلایا کہ کرگل میں جاری اور آئندہ ترقیاتی منصوبوں کو بھرپور تعاون فراہم کیا جائے گا۔

ہندوستھان سماچار

ہندوستان سماچار / محمد اصغر