جودھ پور، 24 اکتوبر (ہ س)۔ وزیر دفاع راج ناتھ سنگھ نے جمعہ کو جیسلمیر کے سرحدی ضلع میں ہندوستان-پاکستان سرحد سے متصل لونگے والا سرحد پر ہندوستانی فوج کی طرف سے منعقد کی گئی تھار شکتی فوجی مشق کا مشاہدہ کیا۔ اس دوران انہوں نے فوج کی جدید جنگی صلاحیتوں اور صحرائی علاقوں میں لڑنے کی تیاریوں کا جائزہ لیا۔ اس موقع پر وزیر دفاع نے فوجیوں کی ہمت، بہادری اور لگن کی تعریف کرتے ہوئے کہا کہ ہندوستانی فوج ہر حال میں ملکی سرحدوں کی حفاظت کے لیے تیار ہے۔ انہوں نے فوجی افسران سے بات چیت بھی کی اور آپریشنل تیاریوں کے بارے میں معلومات حاصل کیں۔

جیسلمیر کے اپنے دورے کے دوسرے دن وزیر دفاع راج ناتھ سنگھ نے جمعہ کو ہند -پاک بین الاقوامی سرحد پر لونگے والا میں ہندوستانی فوج کی تھار شکتی مشق کا مشاہدہ کیا۔ سینکڑوں فوجیوں نے صحرا کی ریت پر جدید جنگی صلاحیتوں اور طاقت کا مظاہرہ کیا۔ اس مشق میں روبوٹ ڈاگ، ڈرون، جدید گاڑیاں، جدید ترین ٹینک اور ہیلی کاپٹر شامل تھے، جو مستقبل کی جنگی مہارتوں اور رفتار اور طاقت کا منفرد امتزاج پیش کرتے ہیں۔ روبوٹک میول کے ذریعے میدان جنگ میں سپلائی کی صلاحیت کا بھی مظاہرہ کیا گیا۔ وزیر دفاع نے فوجیوں کے ساتھ براہ راست بات چیت کرکے ان کا حوصلہ بڑھایا، سڑک پر چلتے ہوئے ان کی گرمجوشی کا مشاہدہ کیا اور بھارت ماتا کی جئے کے نعروں کے درمیان حب الوطنی کا جشن منایا۔

اس موقع پر انہوں نے لونگے والا میدان جنگ میں چاند پوری ہال کا افتتاح کیا جسے 1971 کی جنگ کے ہیرو میجر کلدیپ سنگھ چاند پوری کے اعزاز میں منسوب کیا گیا تھا۔ انہوں نے لونگے والا وار میموریل پر شہدا کو خراج عقیدت پیش کیا۔ لونگے والا وہ تاریخی مقام ہے جہاں ہندوستانی فوج نے 1971 کی ہند-پاک جنگ میں دشمن کو عبرتناک شکست دی تھی۔ تھار شکتی فوجی مشق کے ذریعے فوج نے ایک بار پھر یہ پیغام دیا کہ ملک کی سرحدیں مکمل طور پر محفوظ ہیں۔

قبل ازیں وزیر دفاع راج ناتھ سنگھ نے دنیا کے مشہور تنوٹ رائے ماتا مندر کا دورہ کیا اور پوجا کی۔ ان کے ساتھ چیف آف آرمی اسٹاف جنرل اوپیندر دویدی اور بیٹل ایکس کمانڈر میجر جنرل آشیش کھرانہ بھی تھے۔

انہوں نے 1965 کی ہندوستان-پاکستان جنگ کے دوران پاکستان کی طرف سے گرائے گئے بموں کو بھی دیکھا، جن کے بارے میں خیال کیا جاتا ہے کہ یہ تنوٹ ماتا کے آشیرواد سے نہیں پھٹے تھے۔ اس تاریخی مقام پر راج ناتھ سنگھ نے کہا کہ وہ تنوٹ ماتا کا درشن کر کے فخر محسوس کر رہے ہیں اور یہ مقام ملک کے غیر متزلزل عقیدے اور بہادری کی علامت ہے۔ انہوں نے قوم کی خدمت کے لیے بارڈر سیکورٹی فورس کے اہلکاروں کی ہمت، وفاداری اور عزم کی تعریف کی۔

وزیر دفاع نے سرحد پر تعینات فوجیوں سے ملاقات کی۔ وزیر دفاع نے اپنے ہاتھوں سے فوجیوں کو ناشتہ کھلایا اور ان کی حوصلہ افزائی کی۔ راجناتھ سنگھ نے اپنے جیسلمیر دورے کے دوسرے دن کا آغاز تنوٹ ماتا مندر سے کیا۔ اس کے بعد وہ وار میموریل پہنچے۔ یہاں انہوں نے 1971 کی جنگ سے متعلق معلومات پڑھیں۔ اس دوران وزیر دفاع نے مندر کے احاطے میں محفوظ بموں کو بھی دیکھا، جو اب بھی وہاں نمائش کے لیے رکھے گئے ہیں۔ انہوں نے یہاں آویزاں تصاویر کے بارے میں بھی معلومات لی۔ سنگھ نے جنگی یادگار پر فوجیوں سے بھی ملاقات کی۔

ہندوستھان سماچار

ہندوستان سماچار / محمد شہزاد