وزیر داخلہ کے بغیر عمر عبداللہ حکومت نہیں چلا سکتے ہیں ۔ وقار رسول وانی

جموں، 22 اکتوبر (ہ س)۔ جموں و کشمیر پردیش کانگریس کمیٹی کے سابق صدر وقار رسول وانی نے نیشنل کانفرنس پر عوام کے ساتھ دھوکہ دہی کا سنگین الزام عائد کرتے ہوئے کہا ہے کہ ڈاکٹر فاروق عبداللہ اور عمر عبداللہ انتہائی چالاک سیاست دان ہیں جنہوں نے ہمیشہ ذاتی مفاد کے لیے عوامی جذبات کا استحصال کیا۔ اپنے بیان میں وانی نے کہا کہ نیشنل کانفرنس کی سیاست مکمل طور پر موقع پرستی پر مبنی ہے اور یہ جماعت وزیرِ داخلہ امت شاہ کی پشت پناہی کے بغیر ایک دن بھی اقتدار میں نہیں رہ سکتی۔

انہوں نے کہا کہ این سی-کانگریس اتحاد دراصل کانگریس کے سیکولر ووٹ بینک کو تقسیم کرنے کی ایک چال ہے۔ اگر کانگریس نے ضمنی انتخابات میں نگروٹہ حلقہ چھوڑا تو یہ نشست انڈیا بلاک کے امیدوار ہرش دیو سنگھ کو ملنی چاہیے تھی، لیکن نیشنل کانفرنس نے بی جے پی کو فائدہ پہنچانے کے لیے اپنا امیدوار میدان میں اتارا۔ وقار وانی نے عمر عبداللہ پر براہِ راست تنقید کرتے ہوئے کہا کہ وہ پچھلے تین انتخابات میں بری طرح ناکام رہے ہیں اور انجینئر رشید کے ہاتھوں بھی ذلت آمیز شکست کا سامنا کر چکے ہیں۔

وانی کے مطابق، اگر عمر عبداللہ، شیخ عبداللہ اور فاروق عبداللہ کے فرزند نہ ہوتے تو شاید وہ سرپنچ کا انتخاب بھی نہ جیت پاتے۔ آخر میں وقار وانی نے کہا کہ اب کانگریس قیادت کو بخوبی احساس ہو چکا ہے کہ نیشنل کانفرنس نے پارٹی کے ساتھ کس قدر سیاسی فریب کیا ہے۔

ہندوستھان سماچار

---------------

ہندوستان سماچار / محمد اصغر