نئی دہلی، 7 جنوری (ہ س)۔ سپریم کورٹ نے منگل کو سابق مرکزی وزیر مینکا گاندھی کی پٹیشن پر الیکشن کمیشن اور ایم پی نشاد کو نوٹس جاری کیا جس میں سلطان پور سیٹ سے ایس پی ایم پی رام بھول نشاد کے انتخاب کو چیلنج کیا گیا تھا۔ مینکا گاندھی نے الزام لگایا ہے کہ رام بھول نشاد نے نامزدگی کے وقت داخل کردہ حلف نامہ میں ان کے خلاف درج تمام 12 مقدمات کے بارے میں معلومات نہیں دی ہیں۔قبل ازیں الہ آباد ہائی کورٹ نے ان کی درخواست کو مسترد کر دیا تھا کیونکہ یہ انتخابی درخواستیں داخل کرنے کی 45 دن کی آخری تاریخ کے بعد دائر کی گئی تھی۔ تاہم سپریم کورٹ نے مینکا گاندھی کے ایک اور مطالبے پر سماعت کرنے سے انکار کر دیا۔ مینکا گاندھی نے عوامی نمائندگی ایکٹ کے سیکشن 81 کو بھی چیلنج کیا ہے، جس میں انتخابی درخواستیں داخل کرنے کے لیے 45 دن کی مدت مقرر کی گئی ہے۔ سپریم کورٹ نے کہا کہ قانون بنانا ہمارا کام نہیں ہے۔ ہم اس میں مداخلت نہیں کریں گے۔ عدالت کے رویہ کو دیکھتے ہوئے درخواست گزار نے اپنا مطالبہ واپس لے لیا۔

ہندوستھان سماچار

ہندوستان سماچار / Mohammad Khan