جموں, 22 جنوری (ہ س)۔

بیٹی بچاؤ، بیٹی پڑھاؤ مہم کے دس سال مکمل ہونے کے موقع پر محکمہ سوشل ویلفئیر ڈوڈہ نے خواتین بائیک اور سائیکل سواروں کی ایک شاندار ریلی کا انعقاد کیا۔ ریلی کو ڈپٹی کمشنر ڈوڈہ، ہرویندر سنگھ، نے ڈی سی آفس سے ہری جھنڈی دکھا کر روانہ کیا، جو ڈاک بنگلہ ڈوڈہ پر اختتام پذیر ہوئی۔اس موقع پر ڈپٹی کمشنر نے اپنے خیالات کا اظہار کرتے ہوئے کہا کہ وزیر اعظم نریندر مودی کی قیادت میں شروع کی گئی بیٹی بچاؤ، بیٹی پڑھاؤ مہم نے ملک بھر میں بچیوں کی سماجی برابری اور ان کے حقوق کو یقینی بنانے میں انقلابی کردار ادا کیا ہے۔

انہوں نے کہا کہ آج خواتین مختلف شعبوں میں اپنی موجودگی اور شمولیت کو مضبوطی سے ثابت کر رہی ہیں، اور بچیوں کی پیدائش کو خوشی اور مسرت کے ساتھ منایا جا رہا ہے۔ڈپٹی کمشنر نے مزید کہا کہ محکمہ سماجی بہبود کی جانب سے بچیوں کی پیدائش کے موقع پر ان کی ماؤں کو بیبی کٹ فراہم کی جاتی ہے تاکہ یہ پیغام عام کیا جا سکے کہ بیٹے اور بیٹی میں کوئی فرق نہیں ہے۔ یہ اقدام صنفی مساوات کے فروغ اور سماج میں خواتین کی اہمیت اجاگر کرنے کی ایک اہم کڑی ہے۔

ہندوستھان سماچار

---------------

ہندوستان سماچار / محمد اصغر