نئی دہلی، 2 جنوری (ہ س)۔

وزیر اعظم نریندر مودی جمعہ کو دہلی کو 4500 کروڑ روپے کے مختلف پروجیکٹوں کا تحفہ دیں گے۔ ان میں وزیراعظم وزیر پور میں کچی آبادیوں کے لیے بنائے گئے 1645 فلیٹس کی چابیاں بھی گھر مالکان کے حوالے کریں گے۔

جمعرات کو ایک پریس کانفرنس میں دہلی بی جے پی کے صدر وریندر سچدیوا نے کہا کہ وزیر اعظم نریندر مودی جمعہ کو وزیر پور میں دہلی ڈیولپمنٹ اتھارٹی (ڈی ڈی اے) کے ذریعہ بنائے گئے 1645 سوابھیمان فلیٹوں کی چابیاں اشوک وہار کے رہائشیوں کے حوالے کریں گے۔ ڈی ڈی اے کے یہ فلیٹس جھگی جہاں مکان اسکیم کے تحت بنائے گئے ہیں۔ اس اسکیم کا مقصد کچی آبادیوں کو محفوظ اور مستقل مکانات فراہم کرنا ہے تاکہ وہ باوقار زندگی گزار سکیں۔ انہوں نے بتایا کہ وزیر اعظم نریندر مودی ڈی یو لا فیکلٹی کے ایسٹ کیمپس کا افتتاح کریں گے۔ اس کے علاوہ وہ مغربی دہلی کے دوارکا میں دہلی یونیورسٹی کے کیمپس کا سنگ بنیاد رکھیں گے اور روشن پورہ نجف گڑھ میں دہلی یونیورسٹی کے کیمپس کا بھی سنگ بنیاد رکھیں گے۔

دہلی بی جے پی صدر نے کہا کہ جمعہ کو وزیر اعظم دہلی میٹرو کے چوتھے مرحلے میں رٹھالا، نریلا کنڈلی کوریڈور کا سنگ بنیاد رکھیں گے۔ اس کے علاوہ وزیر اعظم دہلی کے لوگوں کو جنک پوری سے کرشنا پارک کے درمیان میجنٹا لائن کی توسیع دینے والے ہیں۔ وہ روہنی میں سنٹرل آیورویدک ریسرچ انسٹی ٹیوٹ کی عمارت کا سنگ بنیاد رکھیں گے اور دہلی میں ٹریفک جام کو کم کرنے کے ایک پرجوش منصوبے کے تحت نیو اشوک نگر اور صاحب آباد کے درمیان چلنے والی نمو بھارت ٹرین کا بھی افتتاح کریں گے۔

روشن پورہ میں ویر ساورکر کے نام سے منسوب کالج کا سنگ بنیاد

وزیر اعظم نریندر مودی اشوک وہار سے ویڈیو کانفرنسنگ کے ذریعے دہلی یونیورسٹی کے لیے 600 کروڑ روپے سے زیادہ کی لاگت کے تین نئے پروجیکٹوں کا سنگ بنیاد رکھیں گے۔ یہ مشرقی دہلی کے سورجمل وہار کے مشرقی کیمپس میں ایک اکیڈمک بلاک اور دوارکا کے مغربی کیمپس میں ایک اکیڈمک بلاک پر مشتمل ہے۔ اس میں نجف گڑھ کے روشن پورہ میں ویر ساورکر کالج کی عمارت بھی شامل ہے جس میں تعلیم کے لیے جدید ترین سہولیات ہوں گی۔ ویر ساورکر کیمپس 140 کروڑ روپے کی لاگت سے تعمیر کیے جائیں گے۔ یہ دس منزلہ عمارت ہوگی، جس کے ساتھ ہی دوارکا میں 107 کروڑ روپے کی لاگت سے لاء فیکلٹی بھی تعمیر کی جائے گی۔

مرکزی ہاو¿سنگ اور شہری ترقی کے وزیر منوہر لال کھٹر نے دہلی کے ساتوں ممبران پارلیمنٹ کے ساتھ میٹنگ کی اور جمعہ کو اشوک وہار میں منعقد ہونے والے پروگرام کا جائزہ لیا۔ اس بات کو یقینی بنایا جا رہا ہے کہ مستحقین کو فلیٹس کے حصول میں کسی قسم کی پریشانی کا سامنا نہ کرنا پڑے اور اس پروگرام کی وسیع پیمانے پر تشہیر کی جائے۔

ہندوستھان سماچار

ہندوستان سماچار / عطاءاللہ