نئی دہلی، 14 جنوری (ہ س)۔ بھارتی فزیکلی ڈسیبلڈ کرکٹ ٹیم نے چیمپئنز ٹرافی 2025 میں اپنے دوسرے لیگ میچ میں انگلینڈ پی ڈی کو 29 رن سے شکست دے کر مسلسل دوسری جیت درج کی۔

کٹونائیکے کے ایف ٹی زیڈ کرکٹ گراونڈ میں کھیلے جانے والے اس میچ نے ٹیم کے بین الاقوامی اسٹیج پر شاندار کارکردگی دکھانے کے عزم کا اظہار کیا۔ بھارت نے پہلے بلے بازی کرتے ہوئے 191 رن کا ہدف دیا۔ راجیش کنور نے ریکارڈ توڑ پرفارمنس دی، وہ پی ڈی ٹورنامنٹ میں سنچری بنانے والے پہلے کرکٹر بن گئے، انہوں نے ناٹ آوٹ 100 رن بنائے۔ رویندر سنتے نے بھی اس اننگز میں اہم کردار ادا کیا، جنہوں نے 24 گیندوں میں 45 رن جوڑے، جس سے بھارت نے ایک چیلنج بھرا اسکول کھڑا کیا۔

ہندوستانی گیند بازوں نے اسکور کا دفاع کرتے ہوئے درست کارکردگی کا مظاہرہ کیا۔ رادھیکا اور جیتندر کی ابتدائی کامیابیوں نے انگلینڈ کی رفتار کو پٹری سے اتار دیا، جب کہ رویندر سنتے نے 24 رن دے کر 2 وکٹیں حاصل کیں جس سے ہندوستان نے میچ پر اپنی گرفت مضبوط کر لی۔ اگرچہ انگلینڈ کے ول فلن نے 41 گیندوں پر 87 رنوں کی دھماکہ خیز اننگز کھیل کر شاندار واپسی کی لیکن ٹیم 162 رن پر آل آؤٹ ہو گئی۔

ٹورنامنٹ میں ہندوستانی ٹیم کے سفر کو ڈفرنٹلی ایبلڈ کرکٹ کونسل آف انڈیا (ڈی سی سی آئی) اورسویم نامی تنظیم کی حمایت حاصل ہے، جو کہ رسائی اور شمولیت کو فروغ دینے کے لیے پرعزم ہے۔ سویم نے اس بات کو یقینی بنانے میں اہم کردار ادا کیا ہے کہ معذور کھلاڑیوں کو ضروری بنیادی ڈھانچہ اور مواقع ملیں تاکہ وہ بہترین کارکردگی کا مظاہرہ کرسکیں۔

لگاتار دو جیت کے ساتھ ہندوستان نے چیمپئن شپ کے مضبوط دعویدار کے طور پر اپنی پوزیشن مضبوط کر لی ہے۔

ہندوستھان سماچار

ہندوستان سماچار / انظر حسن