نئی دہلی، 06 ستمبر (ہ س)۔ مرکزی تجارت اور صنعت کے وزیر پیوش گوئل نے جمعہ کو کہا کہ اب ہندوستان اور بحیرہ روم کے ممالک کے درمیان تعلقات کو مزید مضبوط کرنے کا وقت آگیا ہے ۔ گوئل نے کہا کہ ہندوستان اور بحیرہ روم کے ممالک کے درمیان سیاحت کے شعبے میں تعاون کے بے پناہ امکانات ہیں۔

نئی دہلی میں کنفیڈریشن آف انڈین انڈسٹری (سی آئی آئی ) کی انڈیا-میڈیٹیرینین ٹریڈ سمٹ 2024 سے خطاب کرتے ہوئے، گوئل نے کہا کہ انڈیا-مڈل ایسٹ-یورپ اکنامک کوریڈور (آئی ایم ای سی) ایک اہم اقدام ہے جو ہندوستان کی سمندری سلامتی اور یورپ- ایشیا کے درمیان سامان کی تیز رفتار نقل و حرکت میں حصہ ڈال سکتا ہے۔ ہندوستان-مشرق وسطی-یورپ اقتصادی راہداری پہل ہندوستان کی سمندری سلامتی میں اضافہ کرے گی۔

وزیر تجارت نے کہا کہ آئی ایم ای سی کا آغاز ہندوستان کی جی-20 کی چیئرمین شپ کے دوران کیا گیا تھا۔ اس کا مقصد متحدہ عرب امارات، سعودی عرب، اردن، اسرائیل اور یورپی یونین کے ذریعے ہندوستان، یورپ، مشرق وسطیٰ کو مربوط کرنا ہے۔ کم رسد کی لاگت، تیز روابط اور سامان کی محفوظ نقل و حرکت خطے میں بہتر تعاون پر منحصر ہے۔ ہندوستان اپنی بندرگاہوں کو وسعت دے رہا ہے، اس کی ترقی کی رفتار تیز ہے۔ ہندوستان اپنے نوجوانوں کو روشن مستقبل دینا چاہتا ہے۔ ملک کے مینوفیکچرنگ سیکٹر میں نمایاں ترقی ہوئی ہے۔

گوئل نے کہا کہ ہندوستان اور بحیرہ روم کے ممالک جہاز رانی کے شعبے میں بڑے مشترکہ مفادات رکھتے ہیں، چاہے وہ جہاز سازی ہو، ملکیت ہو، سمندری شعبہ ہو یا کروز کا کاروبار ہو۔ انہوں نے کہا کہ مرکز کو بندرگاہوں کی ترقی میں بہت بڑا موقع نظر آتا ہے۔ پچھلی دہائی میں بندرگاہوں کی گنجائش دوگنی ہو گئی ہے۔ ہمیں توقع ہے کہ اگلے 5 سالوں میں بندرگاہوں کی صلاحیت دوگنی ہو جائے گی۔

ہندوستھان سماچار

ہندوستان سماچار / محمد شہزاد